Mikayo nga linya sa kuryente miugdaw sa internetan

CEBU, Philippines - Naugdaw ang duha ka andanang  balay  lakip  na  ang  mga computer unit  sa internetan  sa silong  niini  sa usa ka sunog  nga  miulbo mugna  sa  mikayo nga  linya sa kuryente   didto sa Poblacion lungsod sa Tabuelan   sa miaging udto.

Ang tag-iya sa naugdaw  nga  edipisyo  mao si Besing Balves, hingkod , ug molupyo sa maong lugar.

Si FO1 Sandy Badilla sa Tabuelan Fire Station mibutyag   sa Banat News   nga  nagsugod ang sunog sa taas nga bahin sa maong pinuy-anan   ug  gumikan  sa kagaan  sa  mga  dapat  niini  dali ra kaayong  naugdaw.    Matud ni FO1 Badilla   nga  mitabang  usab  og  responde  ang kabomberohan  sa mga lungsod sa Balamban, Sogod  ug San Remegio.

Midugang siya  nga mikabat  usab  sa 10 ka  mga    computer unit sa internetan   sa silong  sa maong balay  ang  nahurot  og  kaugdaw.

Sa inisyal nga imbistigasyon sa kabomberohan  nasuta  nga  electrical short circuit ang hinungdan sa maong sunog ug  padayon  pa  nilang  gikuwenta  ang kinatibuk-ang danyos  sa maong sunog.

Hinuon walay naangol  o nakalas  sa maong  insedente. (BANAT NEWS)