Duha gipatay sa Toledo

CEBU, Philippines - Duha ang patay usa niini mao ang 90-anyos nga iyaan sa gipatay nga political leader ni kanhi Senador Sonny Osmeña , samtang ang usa anaa sa watchlist sa mga drug personalities sa  dakbayan sa Toledo sa niaging adlaw.

Ang unang biktima mao si Faulina Sordilla Risane, biyuda, nagpuyo sa Sityo Engkamote sa barangay Captain Claudio Toledo City ug iyaan sa gipatay nga political leader ni Osmeña nga si Resane Embrahelag.

Samtang ang laing biktima sa pagpamusil sa Sityo Tubod barangay Matab-ang siyudad sa Toledo mao si Simplicio Nengasca Jr., 25,  taga Sityo Tapon sa barangay Matab-ang, gipasanginlan sa mga polis nga drug suspect sa lugar.

Matud ni PO1 Emmanuel Aragon sa Toledo City Police Station dihang nahinabi sa Banat News ang unang biktima nga si Risane gipusil sa ulo samtang natulog kauban ang iyang anak nga si Bonifacio.

Ang mamumuno gikatahong anha nanukad sa gawas sa balay sa namatay alas-dose sa tungang gabii.

Walay naka-klaro sa panagway sa suspek tungod kay ngitngit ang palibot ug dali kining nakasibat pahilayo.

Samtang gisundan kini sa laing pagpamusil diin matod ni PO1 Aragon sa pasiunang imbistigasyun ang biktima nga si Nengasca nga giilang apil sa watchlist sa kapulisan sa transaksiyon niini sa gidiling drugas gigukod kini sa nagmotor nga suspek ug pag-abot sa usa ka panimalay ni Victorino Mahilum na corner kini ug didto gipusil ug maayong pagkaigo sa aping ug nilapos ang bala sa walang dunggan ug patay dihadiha.

Ang niresponding mga polis naka-recover og 1 ka kabhang sa bala sa kalibre .45 ug ang maguwang sa biktima nga si Jalyn Mahilum atol sa imbistigasyun nitug-an nga ang biktima nalambigit kini sa negosyo sa gidiling drugas.

Ang duha ka kasong pagpamusil padayun pang giimbistigar sa kapulisan ug dunay report nga ang biktima nga si Risane dunay problema sa luna nga maoy posibling hinungdan apan wala sab isalikway ang ubang posibling motibo.  (BANAT NEWS)