Motor vs. awto 1 patay, 4 angol

CEBU, Philippines - Usa ang patay ug laing upat ang angol human giingong ang habal-habal nga ilang gisakyan  aksidenteng nabanggaan sa Kia Rio nga awto niadtong Huwebes sa kadlawon diha sa barangay Mohon, dakbayan sa Talisay.

Ang suspetsado mao si Jefferson Tamidler, hingkod ang panuigon, taga barangay Biasong, dakbayan sa Talisay, drayber sa Kia Rio nga nagtangag sa plakang YKJ-312 nagtingkagol sa Talisay City detention cell. Si Tamidler giingong nanimahong ilimnong makahubog atol sa maong aksidente. Ang biktimang si Eleasar Dejos, hingkod ang panuigon, taga barangay Pooc, Talisay, drayber sa Racal nga motorsiklo nga nagtangag sa plakang TP-060607 ang namatay ngadto sa Vicente Sotto Memorial Medical Center kini base sa report sa police traffic division sa Talisay. Ang naangol mao si Baldwin Babor, 22, taga barangay Lawaan III, Talisay drayber sa Honda wave nga motorsiklo nga nagtangag sa plakang 4711-IQ ug ang ilang mga pasahero nga sila si Crisilda Lahindao, 20, taga barangay Pooc, Michelle Dinawanao, 25, taga barangay Pooc usab ug John Vincent Abellana, 19, taga barangay Dumlog, Talisay. Sa imbestigasyon ni SPO2 Nestor Canlobo nga si Tamidler nagbiyahe kini gikan sa Tabunok paingon na untang mopauli apan kalit kining mibangga ngadto sa duha ka motorsiklong iyang kasugat.  (BANAT NEWS)