Sakop sa Laglag Barya nasikop sa iyang biktima

CEBU, Philippines - Nasikop sa usa ka babaye ang  sakop sa “Laglag Barya Gang” dihang  nasakpan  niya kini  nga maoy mikuot   sa iyang pitaka  nga  puno  sa kuwarta sulod  sa gisakyan  nilang  jeep  pasaheroan  didto  sa dalan M.C.  Briones sa barangay Tipolo,   dakbayan sa Mandaue   sa miaging  buntag.

Si PO2 Modesto Lutchavez sa kapolisan sa Presinto 1 miila sa nadakpan nga si Genever  Ramirez, 34 , minyo nga taga sitio Calapokan sa barangay Carreta sa  dakbayan sa Sugbo.

Ang   maong suspetsado  nadakpan  pinaagi  sa pagkuwelyo  niini  sa iyang  gibiktima  nga si Abegail Naul, 49, nga taga barangay Talamban sa dakbayan sa Sugbo  ug nagtrabaho isip sales representative sa usa ka establisamento sa dakbayan sa Mandaue.

Matud pa ni PO2 Lutchavez nga   base  sa gitug-an sa biktima nga nagsakay siya og PUJ gikan sa barangay Ibabao  Estancia ug   sa pag-abot  niini  sa dalan M.C. Briones sa barangay Tipolo  iyang namatikdan nga nangatagak ang sinsiyo sa sawog sa PUJ.

Ang lalaki nga gikatupad   niya sa paglingkod  kalit  kaayong  nakapamunit  sa  mga  sinsiyo  sa hawanan  sa jeep.

Human  niini  og  punit gimandaran  ang  drayber  sa  pagpahunong  sa sakyanan  dayon  nanaog  kini.

Apan  nakurat  ang  biktima  kay  pagsil-ing  niya  sa  bag  naabli  na ang  tabon   ug  nawagtang  na ang  iyang  pitaka sa sulod  niini.

Busa  nanaug  usab  siya  sa jeep  ug  giapas  ang  suspetsado  kinsa  kalma  kaayong  naglakaw   ug nagpaabot  og  laing  sakyanan.

Diha-diha  iyang  gikuptan  ang  kuwelyo  sa senina  niini   dayon  misinggit  siya  nga  kawatan! Kawatan! Tabang!

Gumikan  sa kakusog  sa iyang  singgit  wala  usab  makalihok  ang  suspetsado  ug  midugok  ang  mga tawo  nga  nakakita  sa tawo  nga  iyang gikuwelyohan  ug  dali  kining  mitabang  kaniya  sa paggunit  sa maong kawatan.

Si PO1 Rufo Beato sa kapolisan sa Presinto 1 sa barangay Centro nga nahiagi sa maong dapit maoy midakop sa maong suspetsado ug gidala  ngadto sa Presinto 1 ug gibalhog sa ilang detention cell.

Matud  pa sa  kapolisan  nga  mao  kini  modus  operandi sa  mga  sakop  sa Laglag Barya  gang  nga  manghagbong  og  sensiyo  sa hawanan  sa jeep  dayon inigkalipat  sa tupad  nila  nga  pasahero  kuhaon  dayon  ang  sulod sa bag  niini.

Sa pagkakaron  gihikay  na ang  tukmang  kaso  nga  isang-at  batok sa suspek. –(BANAT NEWS)