Bay sa negosyante girakrakan

CEBU, Philippines - Natusak -tusak sa bala ang pinuy-anan ug mga butang  sulod sa pinuy-anan sa usa ka negosyante human kini rapidoha  sa  mga  bala sa  wala  hiilhing mga kriminal didto sa barangay Binabag, siyudad sa Bogo kagahapon sa  ala 1:15 sa  kaadlawon.

Ang biktima mao ang magtiayon nga Camelo Becaldo, 52,  ug ang asawa niini nga si Rebecca Becaldo, 56 , nga  nagpuyo sa maong  lugar  isip mga negosyante.

Nasuta  nga ang  duha  ka  mga  kriminal  nagsakay  og  motorsiklo  dihang  mipaarak  og  mga  bala   sa balay  sa  magtiayong  negosyante.

Si PO1 Alexander Ancao Jr., sa Bogo City Police Station mibutyag  sa Banat News nga nahitabo  ang  pagpangrapido  samtang nahinanok sa  pagkatulog  ang magtiayon  uban  sa   ilang mga anak.

Matud  pa  ni PO1 Ancao  nga  mao  na lay namat-an sa  mga  biktima ang nagpaka-paka  nga  mga  buto  sa armas  de fuego  kansang  mga  bala naglaposlapos  sa ilang  mga  bongbong  ug  bintana  ug maayo  na lang  kay  walay  naigo  kanila.

Namangon  ang  tibuok  sakop  sa pamilya  dihang  namiya  na ang  mga  kriminal

Dihang  gisusi  sa kapolisan  nakonpirmar  nila  ang  pagkagusbat  sa  mga  bildo  sa bintana  nga  jalousy   ug  nabuak  usab  ang    TV flat screen nga balor  og  P20  mil  nga nasabak  sa  nagtuasik  nga  bala.

Ang miresponding kapolisan nakapunit usab  og   walo ka kabhang sa bala sa kalibre .45  nga pistola ug laing upat ka nalumping  na  nga  bala   sa palibot sa pinuy-anan  sa mga biktima.

Duha  lang  ka  anggulo  ang  gipunting  sa  kapolisan  nga  kundi  negosyo, mahimong  politika  ang  nagpaluyo  sa maong  pagpangrakrak. (/WC)   (BANAT NEWS)