Pilgrim Relic ni St. Therese of Lisieux moabot dinhi sa Sugbo

CEBU, Philippines - Ang Pilgrim Relics ni St. Therese of Lisieux o mas naila isip si “St. Therese of the Child Jesus” mobisita sa Sugbo gikan sa Pebreo 24 hangtud sa Marso 1 sa Carmelite Monastery sa Mabolo, Cebu City.

Gikan sa Ormoc City, ang pilgrim relics maabot alas 7:00 sa buntag sa Benito Ebuen Airbase in Mactan sa Pebrero 24 ug sundan kini sa usa ka Welcome Mass sa Air Force Chapel sa alas 8:00 buntag, i-officiate ni Bishop Leopoldo Tumulak.

 Adunay motorcade sa alas 10:00 sa buntag paingon sa Central Command (Camp Lapulapu) diin adunay welcome mass nga pangulohan ni Cebu Archbishop Jose Palma alas-12 sa udto. Ang relic mo-stay overnight sa Central Command Chapel.

Sa ikaduhang adlaw, adunay motorkada  gikan sa Central Command padulong sa Carmelite Monastery sa alas 5:00 am, apan mohapit kini sa St. Therese Parish ug dayon ngadto sa Philippine National Police (PNP) Police Regional Office (PRO)-7, diin adunay Misa sa alas 6:00 sa buntag.

Gikan sa PRO7 sa alas 8:30 sa buntag padulong sa San Carlos Seminary College ug moabot kini sa Carmelite Monastery sa alas 10:00 sa buntag.

Si Cebu Archbishop Emeritus Ricardo “Cardinal” Vidal maoy mangulo sa Welcome Mass sa alas 10:30 sa buntag ug ang veneration of the relic magsugod human sa Misa. Sa susamang adlaw adunay misa sa alas 2:30 ug 6:30 sa hapon.

Sa Pebrero 26 ug 27, adunay misa sa alas 6:00 sa buntag, 10:30 sa buntag, 2:30 sa hapon ug 6:30 sa hapon ug ang Carmelite Monastery gate manirado sa  alas 10 sa gabii.

Sa Pebrero 28, adunay Solemn Procession nga magsugod sa alas 7:00 sa gabii gikan sa Carmelite Monastery paingun sa Metropolitan Cathedral. Sa dili pa ang prosisyon, adunay misa sa alas 6:00 sa buntag, 10:30 sa buntag ug 5:00 sa hapon.

 Human sa Solemn Procession, usa ka Farewell Mass ang i-officiate ni Archbishop Jose Palm sa alas 9:00 sa gabii ug inig alas 10:30 sa gabii aduna na poy solemn procession pabalik ngadto sa Carmelite Monastery, diin adunay vigil nga pagahimuon.

Sa Marso 1, usa ka misa ang himuon alas 2:00 sa kaadlawon ug farewell ceremony sa alas 5:00 sa buntag ug laing farewell Mass diha sa Naval Chapel ug pagka alas 7:00 sa buntag ang Pilgrim Relics of St. Therese of the Child Jesus mopadulong na sa Bohol.

Ang mga relics gikan sa Basilica of St. Therese in Lisieux, France ug naabot sa Pilipinas niadtong Disyembre 15, alang sa upat ka buwan nga tour sa kapin 48 ka mga archdiocese and dioceses sa tibuok nasud, lakip ang Sugbo. Si St. Therese mao ang giila nga “the greatest saint for modern times”. Sa edad nga 15, nisulod siya sa Carmel, ubos sa usa ka special papal dispensation nga mitugot kaniya bisan sa iyang pagkabatan-on. Apan namatay siya siyam ka tuig ang nilabay. (BANAT NEWS)