Ex-con nga dispatser gibirahan sa colon patay

CEBU, Philippines -  Naglunang sa kaugalingong dugo ang usa ka dispatser nga usa usab ka manghugasay og plato diha sa usa ka barbekyuhan sa dalan Colon sa miaging gabii.

Ang biktima nailhan sa ngalang Freddie Fuentes, kinsa nakaangkon og samad pinusilan sa iyang apapangig nga nakaingon sa iyang kamatayon.

Sumala pa sa agalon sa biktima nga si Damaso Antig, nagkuha og tubig ang biktima dihang kalit silang nakadungog og sipang buto ug nanagan ang iyang mga kustomer.

Sunod niyang nakit-an ang iyang dishwasher nga si  Fuentes nga nagkadugo nga nagbuy-od sa semento.

Matud pa ni Antig duha ka higayon nang nasulod sa National Bilibid Prisons sa Muntinlupa si Fuentes sa wala niya masayring kaso.

Nagtuo si Antig nga kaaway ni Fuentes ang mihimo sa krimen. Si PO3 Lou Pagara sa Homicide Section sa Cebu City Police Office mibutyag nga sa ilang inisyal nga imbestigasyon ilang nasayran nga ex-convict ug daghan na usab kini naka-away. Usa ka disposable syringe usab ang nakuha diha sa bulsa niini. Padayon pa sa pag-imbestigar ang kapolisan sa maong kaso tungod kay bisan sa kadaghan sa mga tawong nangaon diha sa lugar pulos sila nangambot sa pagpangutana sa mga polis.  (BANAT NEWS)