200 ka paresan ipakasal sa Pag-Ibig

CEBU, Philippines - Ang Home Development Mutual Fund o  PAG-IBIG Fund mopasiugda og  libre  nga mass wedding  sa mga 200 ka  paresan nga membro niini sa nagkalainlaing  trabaho,    nga dili pa kasado.

Matud pa ni Rio R. Teves, Department Manager III sa Pag-IBIG nga kining maong mass wedding adunay tema nga "I Do. I Do. Araw ng Pag-IBIG"  nga  dungang ipahigayon  sa gipiling mga sangang buhatan sa Pag-ibig sa tibook nasud nga  naglakip  sa mga branches sa habagatan ug amihanang bahin sa Sugbo  karong umaabot nga Pebrero 14 o  Valentines Day.  

Dugang pa ni Teves nga aron mahimong espesyal ang maong okasyon, ang mga magtiayon makasal  sa maong  petsa mao  kadtong  sayong miparehistro nga kompleto og  mga dokumento alang sa kasal.

Gipadayag ni Teves nga dili molabaw sa 200 ka mga magtiayon ang ipakasal nga libre dinhi sa Sugbo  sa maong petsa.

Samtang  sa bahin  ni Atty. Darlene Marie B. Berberabe, chief executive officer  sa  Pag-ibig  nga sila nga malantaw  unta sa hingpit na  nga  mga magtiayon  ang Pag-IBIG isip ilang partner, ug bahin na  sa ilang  kinabuhi samtang motukod sila og kaugalingon nilang pamilya.

Midugang  siya  nga  kining maong  kasal nga libre himoon  sa Pag-ibig  tungod  kay nasayud  kini  nga  gumikan  sa kaapiki  sa panalapi  naglisud  sa pagpakasal  ang  pipila  sa ilang  mga  sakop.

Gibutyag ni Teves nga ang Pag-IBIG gusto usab nga makabaton og bag-ong  balay  ang  bag-ong managtiayon  nga maoy ilang kapuy-an  sa tibook nilang kinabuhi .Niadtong miaging Pebrero 8 ning tuiga mao ang deadline sa pagsumiter sa magpakasal. (BANAT NEWS)