Namista sa senyor gi-ulo pagpusil patay

CEBU, Philippines - Patay ang usa ka mamistahay human kini gipusil ug naigo sa ulo samtang nanabo  tungod sa pista sa sitio Maican sa barangay Lawis sa lungsod sa San Remegio niadtong Domingo sa alas- 3  sa hapon.

Ang biktima mao si Elizar Romo Bulique,  taga barangay Looc sa San Remegio samtang ang suspek mao si Roy Singote, nagpuyo ra sa maong lugar.

Matud ni SPO4 Mario Revilla sa San Remegio Police Station nga nahinabi sa Banat News nisuroy sa maong lugar ang biktima tungod sa pista senyor sa maong lugar apan samtang nakig-inom kalit kining giduol sa suspek ug walay daghang pangutana gipusil ang ulo niini.

Patay na pag-abot sa Verallo District Hospital sa siyudad sa Bogo ang biktima samtang ang suspek nisibat dayun human sa hitabo.

Usa ka buhing bala sa kalibre .38 ang nakuha diha sa crime scene nga gituohang gikan sa armas sa suspek. Giingong nabilanggo na kaniadto ang suspek sa wala pa mahibaw-ing kaso nga gi-dismiss sa korte tungod sa pagdumili sa reklamante. (BANAT NEWS)