Sampot sa polis nababha sa armas sa kauban

CEBU, Philippines - Na-angol ang usa ka polis human aksidenteng nibuto ang armas nga gilimpyohan sa usa ka Field Trainee Police sa compound sa Provincial Public Safety Company sa Don Andres Soriano Lutopan siyudad sa Toledo niadtong Biyernes sa alas 4:15 sa hapon.

Ang nabiktima sa accidental firing mao si PO2 Marciano Suarez Jr., nadestino sa Pinamungahan Police apan kasamtangang gi-augment sa substation sa Das Lutopan Police Station sa maong siyudad tungod sa expanded night watch program sa PNP.

Samtang ang suspek mao si PO1 Careby Clyde Valle Alinsog, 23, taga Poblacion Oriental sa lungsod sa Consolacion nga nadestino usab sa maong lugar.

Matodni SPO1 Gerson Lebumfacil sa Toledo City Police Station dihang nahinabi sa Banat News naglimpyo sa iyang armas  si PO1 Alinsog sud sa compound nianang tungora apan kalit nga nibuto ang armas niini.

Sumala pa nga bisan gipaubos niya ang armas nibanda ang bala diha sa sementadong salog ug napunta sa sampot ni PO2 Suarez nga diha ra sa duol niadtong higayuna.

Dali dayun kining gitabang sa mga kaubanan ug gihatud sa Carmen Copper Hospital ug pagkahuman gibalhin sa South General Hospital sa siyudad sa Naga, hinuon luwas na kini gikan sa peligro sumala pa sa report.

Samtang si PO1 Alinsog gidis-armahan dayun sa mga kauban  ug kasamtangang gibalhug sa karsel samtang gihikay ang tukmang sumbong nga ipasaka batok kaniya.(EIM)(BANAT NEWS)