Karne nga di inihaw sa ihawan sa Talisay may service fee

CEBU, Philippines - Ang  mga supplier og karne  sa kamerkadohan ug supermarket sa Talisay kinsa wala magpaihaw sa ilang mga hayop  sa ihawan sa siyudad pabayaron og regulatory service fee.

Si Talisay City Veterinarian, Santiago Hortel nagkanayon nga       ang maong mga karne nga  gikan  sa gawas  ilang  ipa-inspection pagsuta kung giihaw ba kini  sa double A o triple A nga ihawan pagsiguro  nga dili kini makadaot sa panglawas sa konsumidor. Aron ang siyudad makabaton  og kita sa maong mga karne ang mga supplier niini pabayaron og regulatory service fee pinasubay sa ordinansa sa dakbayan.

Matud ni Hortel nga ang   usa  ka ordinansa bahin sa maong regulatory service fee naaprobahan sa konseho sa siyudad niadtong Nobembre 27, 2012 ug niadtong Enero 1, 2013 ang maong ordinansa gisugdan  na  sa pagpatuman.

Ang regulatory service fee sa mga karneng baboy tag P15 matag usa , P1 sa matag kilo sa imported nga karne ug P.50 sa matag usa ka kilo sa manok.

Sa laing bahin, si  Hortel nagkanayon nga padayon ang ilang higpit  nga  pag-monitor sa kamerkadohan sa siyudad ug mga supermarket  bahin sa mga double dead   nga karne  o  mga hayop  nga  gilapa  ug  gibaligya  lang  gihapon  bisan  daan  nang patay.

(BANAT NEWS)