Gubot sa City Jail 2 angol

CEBU, Philippines - Diriyot magka-riot sulod sa Cebu City Jail kagahapon human duha ka mga priso ang nangadunggaban sa ilaha mismong mayor de mayors pasado alas-12 sa udto kagahapon.

Tungod sa kagubot miresponde ang mga sakop sa Special Weapons and Tactics sa Cebu City Police Office (CCPO) ug Special Reaction Unit (SRU) sa Cebu Provincial Police Office (CPPO) ug gi-deploy sa palibot sa maong bilanggoan.

Ang karambola nahitabo diha sa visiting area 3rd floor  diin usab ka Alinor ‘Brix’ Andingan ug Michael Sansan ang nadunggaban sa mayor-de mayores sa mga priso nga si Ariel ‘Bobong’ Degamo.

Sa pasiunang imbestigasyon sa kadagkuan sa Cebu City Jail nasayran nga ang samtang diha sa visiting area silang Degamo ug Andingan kalit lang sila  nga naglalis.

Tunga-tunga sa kagubot giingong nadunggaban ni Degamo si Andingan napulo ka higayon sa kalawasan. Si Sansan misuway unta og pugong kang Degamo apan  apil kini sa nadunggaban upat ka higayon.

Tungod sa nahitabo, nagkagubot na ang ubang mga priso ug dunay giingong mitumaw nga dinapigay sa mga priso hinungdan nga naalarma og maayo ang mga jailguards ug mitawag og backup sa kapolisan.

Si Supt. Johnson Calub ang Jail Warden sa maong prisohan miklaro dayon sa mga sakop sa media nga walay nahitabong riot kay ang nahitabo away lang sa duha ka piniriso.

Sumala pa ni Calub dunay mga grupo sa mga priso nga nangasuko sa nahitabo tungod sa pag-unay sa mga bilanggo ug miinit og maayo sa sitwasyon diha sa sulod dihang gisuwayan nila og tulod ang mga rehas apan nakontrolar ra sila dayon walay nahitabong riot.

Si Andingan adunay kaso bahin sa ilegal nga drugas samtang si Sansan may kasong murder gidala na sa tambalanan samtang gibuwag sa ubang mga bilanggo si Degamo.

Si Degamo adunay nagpatong-patong nga mga kaso nadakpan sa Talibon, Bohol tungod sa kasong frustrated murder,  aduna usab kini two-counts of illegal possession of firearms, two counts of robbery sa San Miguel, Bohol.  Laing kaso usab ang gipasangil kaniya didto sa Mindanao diin siya maoy gipasanginlang mipatay sa radio broadcaster nga si Arecio Padrigao sa Ginggog City, Misamis Oriental ug laing kasong robbery niadtong 2009 sa Misamis Oriental.

Matud pa ni Calub padayun pa sila sa ilang imbestigasyon kalabot sa maong insidente.

(BANAT NEWS)