Amerkano nangulata og asawa gidakop

CEBU, Philippines - Usa ka Amerkano ang  gidakop sa kapolisan human gipasanginlang nikulata sa iyang asawa nga giingong namugos pagsulod sa ilang giabangang apartment sa dakbayan sa Mandaue niadtong Pasko alas 11:30 sa gabii.

Ang suspek mao si Douglas Pasniak, 41, usa ka misyonaryo ug temporaryong nagpuyo sa Singson Village, Brgy. Tipolo sa maong dakbayan samtang ang mireklamo mao ang asawa niini nga si Junalyn Pasniak, 24.

Matod ni Junalyn nga nianang gabhiona, mibisita siya sa balay sa iyang amahan sa Brgy. Mabolo dakbayan sa Sugbo ug iyang gitawgan si Douglas ug gipangutana kun asa kini ug miingon ang suspek nga anaa kini sa balay sa iyang higala.

Apan sa dihang miuli ang biktima sa ilang giabangang apartment, nakugang siya gumikan kay naa didto ang sakyanan ni Douglas ug nagduda kini nga dunay laing kuyog ang iyang bana sulod sa ilang pinuy-anan.

Tungod niini, gitawgan niya pagbalik ang iyang bana ug nagsugod ang ilang panaglalis sa telepono gumikan kay namugos kini nga mosulod sa ilang apartment apan wa gyud kini pasudla.

Tungod sa kasuko, migawas ang suspek ug gikulata ang biktima ug giitsa sa aseras hinungdan sa pagkaangol niini.

Ang biktima midangop sa Mandaue City Police Station (MCPO) 2 hinungdan sa pagsikop sa suspek. Apan nakagawas ra sab dayon kini gumikan kay dugay nakapasaka og kaso si Junalyn.  (BANAT NEWS)