Opisyal sa CIDG nangunay og dakop sa iyang ig-agaw

CEBU, Philippines - Gidakop sa mga sakop sa Criminal Investigation and Detection Group (CIDG) 7 pinangulohan ni Insp. Delfin Bontuyan ang kaugalingon niining ig-agaw  nga nalambigit sa pagpanulis niadtong Lunes sa gabii diha sa Barangay Talamban sa siyudad sa Sugbo.

Si Jerome Bontuyan Bontia, first degree cousin ni Bontuyan, ang gidakop pinasikad sa warrant of arrest nga giisyu ni Judge Enriquita Belarmino sa Regional Trial Court Branch 57.

Si Bontuyan miingon nga ang maong warrant niadto pang 2008 na-isyu apan sa niaging adlaw pa lang niya kini nahibaw-an. Bag-ohay pa usab naabot gikan sa nasud sa Ireland ang iyang ig-agaw nga si Bontia.

Si Bontuyan mitug-an nga suspetsado si Bontia sa pipila ka mga kaso sa pagpanulis sa Cebu sukad pa niadtong dekada 90 ug kasagarang biktima niini mga maestra.

Kini ang unang higayon nga napasakaan og kaso si Bontia, matud pa. Dugang pa ni Bontuyan, kasagaran sa mga kaso nga gipasaka batok kang Bontia kaniadto pulos na-dismiss. Matud pa usab ni Bontuyan, nga si Bontia gipaubos sa iyang mga igsuoon babaye sa usa ka rehabilitation center tungod sa paggamit sa ilegal nga drugas.

Siya usab mismo iyang gipriso si Bontia sa CIDG -7 kapin sa usa ka tuig para usab ma-rehabilitate unta kini.

Human kini milarga sa Ireland pagka-2008 apan sa pagbalik niini dinhi sa Pilipinas giingong mibalik kini pag-usab sa iyang bisyo.

“Abi man nako og nagbag-o na akong ig-agaw. Mao man lang gihapon,” sumala pang Bontuyan.

Atol sa pag-aresto si Bontia, mibahad ang amahan niini ngadto sa kapulisan na iya silang atubangon sa husgado kung dunay mahitabong dautan sa iyang anak, matud pa.

“Normal ra man ‘na nga reaksyon sa usa ka amahan. But no one is above the law,” matud pang Bontuyan. Lisod tuod modakop og kadugo pero mas lisod ang pagsalikway sa balaod, matud pa ni Bontuyan. (EIM) (BANAT NEWS)