RH Bill botaran karong adlawa sa Kongreso
CEBU, Philippines - Karung adlawa masayran kun mapasar ba sa Kongreso ang kontrobersyal nga Reproductive Health Bill uban niini nakuyawan na sa resulta sa botasyon.
Tungod niini, sayo kagahapon nga nagtapok ang mga pro-life groups diha sa Fuente Osmeña Circle, bitbit ang ilang tagsa-tagsa ka mga banners nga nagsupak sa RH Bill.
Usa sa mga banner mao ang nasuwat nga 12-12-12, Judgment Day, diin gihulagway nga karung adlawa na ang adlaw sa paghukom ug kun aprobahan ba ang balaudnon o dili.
Aduna usab naghulagway nga ang RH Bill usa ka demonyong balaudnon nga makadaot sa katawhan. Daan na silang mibahad nga adto na lang manimawos sa mga politikong pabor sa pagpasar niini atol sa piniliay.
Ang chapter head sa Human Life International- Cebu nga si Dr. Rene Bullecer mibutyag nga angayan gyud nga ibasura ang RH Bill tungod kay kadaot lang niini ang ihatag sa nasud.
Apan usa sa mga pabor sa RH Bill nga si Akbayan Women's Collective Shyne Embalzado miingon nga kung mapasar gyud isip usa ka balaod ang RH Bill isipon nila kining dakong regalo.
Ang Catholic Bishops Conference of the Philippines pinaagi sa ilang presidente nga si Cebu Archbishop Jose Palma nanawagan sa mga obispo sa tibuok nasud nga makig-diyalogo sa mga kongresista sa ilang mga hurisdiksyon aron agnihon silang supakon ang RH Bill.
Giklaro hinuon sa Simbahan nga dili nila pugson ang mga politiko pagpabor sa ilang kawsa kondili igo ra nilang dasigon ang mga magbabalaod nga gamiton ang konsensya sa ilang pagbotar karong adlawa. (BANAT NEWS)
- Latest
- Trending