Kasong sibil batok STC gibasura sa korte

CEBU, Philippines -  Gibasura ni Regional Trial Court (RTC) Judge Silvestre Maamo Jr. sa Branch 17 ang amended complaint kabahin sa intervention nga gipasaka sa mga ginikanan sa mga menor kinsa wala tugoting makaapil sa ilang graduation rites sa Saint Teresa College High School Department tungod sa kalapasan.

“In time, this court rules that the amended complaint in intervention is improper in this case,” tipik sa resolusyon ni Maamo.

Kahinumduman nga niadtong Marso 30, lima ka mga estudyante sa STC ang wala paapila sa ilang graduation rites tungod kay giingong nakalapas sila sa rules and regulation sa tunghaan pinaagi sa pag-post og mga law-ay nga hulagway diha sa ilang Facebook account. Sa wala pa ang adlaw sa ilang graduation ang mga ginikanan sa maong mga menor ang mipasaka og kasong sibil ngadto sa korte aron mapangitaan og paagi nga makaapil sa graduation rites ang ilang mga anak. Si Judge Wilfredo Navarro kinsa maoy unang naghupot sa kaso ang miluwat og temporary restraining order (TRO) nga nagmando sa tagdumala sa tunghaan sa pagpatuman  sa cease and desist sa pag-implementar og sanction batok sa mga menor. Apan ang STC wala motuman sa mando sa korte. Niadtong Abril 2, 2012 si Navarro ni-inhibit sa maong kaso diin iyang gitumbok nga ang maong kaso nasakop kini sa family court. Sa iyang bahin, si Maamo sa resolusyon niini nagkanayon nga tungod sa conflicting rulings sa korte kabahin sa kaso, ang motion for intervention gituki kini ug magbilin unang un-acted. Niadtong Nobiyembre 20, 2012 ang korte mipahigayon og pre-trial sa kaso apan ang abogado sa defendants mikwestiyon sa intervenors ug mitumbok nga walay mga personalidad nga makaduso og motion tungod kay wala dawata ang ilang intervention. Dunay tulo ka mga intervenors sa kaso diin ang original nga petitioner nakig-areglo na sa tunghaan. Ang injunctive relief nga gihangyo sa mga intervenors nahimo nang moot and academic. Apan matud ni Maamo nga bisan og nabasura ang amended motion for intervention sa mga intervenors pwede gihapon silang makapangita og laing remedyo pinaagi sa laing lakang. Ang abogado sa mga intervenors nga si Atty. Cornelio Mercado nagkanayon nga dili lang una siya mokomento samtang wala pa niya madawat ang resolusyon sa kaso.  (BANAT NEWS)