TF Calungsod nag-inspeksyon

CEBU, Philippines - Giinspeksyon kagahapon sa buntag sa mga sakop sa Task Force Calungsod ingon man Presidential Security Group sa Malacañang ug kaparian ang templete sa South Reclamation Area alang sa Thanksgiving mass karung Biyernes diha sa south road properties diin tambongan kini sa minilyong katawhan.

Kagahapong adlawa personal nga misusi ang kapolisan, presidential security group ug kaparian sa templete aron ilang masuta ang preparasyon sa seguridad sa maong lugar sa umaabot Biyernes.

Apan ang kapolisan mipahimangno ngadto sa katawhan kun unsa ang pagadad-on sama sa tubig, payong ug pagkaon ug kung unsay ilang buhaton kun motambong sa maong kasaulogan.

Ang hepe sa kapolisan sa syudad sa Sugbo, Sr. Supt Ramon Melvin Buenafe mibutyag nga daghang polis ang ilang ipakatap atol sa maong adlaw. Samtang kung magdala sila og mga bata kinahanglang pasul-obon sila og ID o tag nga diin nakasuwat ang ilang pangalan, pangalan sa ginikanan, address ug numero sa telepono.

Gihangyo ni Buenafe ang katawhan nga sundon gyud ang mga pahimangno sa kapolisan aron hapsay ug malinawon ang maong selebrasyon.

Samtang si Msgr. Dennis Villarojo, ang Cebu Celebration Coordinator mipahimangno usab nga unta kun motambong sa maong selebrasyon dili magsul-ob og mga malaw-ay nga sinina tungod kay pag-ampo man ang tumong sa selebrasyon. (EIM) (BANAT NEWS)