Dumanjug ipaubos sa area of concern?

CEBU, Philippines - Gisugyot  ngadto  sa  Commission on Election (COMELEC) nga i-apil sa mga lungsod ug siyudad dinhi sa Sugbo   ang  lungsod  sa Dumanjug  nga  ipaubos sa  Area of Concern karong umaabot   nga eleksiyon  sa sunod tuig.

Ang kanhi president sa Cebu Mayors’ League  ug kanhi Dumanjug mayor Sarsi Baricuatro maoy miduso   sa maong  sugyot  ngadto  sa Comelec human niya  masud-ong nga mibokal  na ug  nagka- init na  pag-ayo  ang  politika  sa maong  lungsod  .

Si Baricuatro subling nagpapili pagka -mayor sa lungsod sa Dumanjug ubos sa Liberal Party ( LP)  kansang  kandidato  sa pagka-gobernador   mao  si Hilario ‘Junjun’ Davide III.

Si  Baricuatro  maoy  ika-atbang ni incumbent mayor Nelson Garcia, maguwang ni Governor Gwendolyn  Garcia ug igsoon ni Kongresista Pablo John Garcia sa  ikatulong distrito sa  lalawigan  sa Sugbo nga mao  usab  ang  kandidato pagka gobernador sa One Cebu Party.

Matud ni Baricuatro atol sa interview sa Bantay Radyo nga nangreklamo na ang ilang mga supporter sa kabarangayan ilabina sa bukid tungod kay kanunay na  kuno  nga balik- balikan   ang ilang lugar matag karon ug unya sa  ilang  mga  kaatbang  sa politika aron kombinsihon nga makig-uban kanila sa umaabot  nga eleksyon.

 Ang gikabalak-an ni Baricuatro mao ang mga tawo nga sugoon sa pagsuroy -suroy sa kabukiran kansang  mga  dagway kadudahan  kay  dili  ilado  sa maong  lugar.

Nunot niini si Baricuatro mihagit sa kampo ni Mayor Garcia nga makigpirmahay og covenant alang sa hapsay ug malinawon nga eleksyon.

Hinuon napakyas   kining tigbalita   sa pagkuha sa habig ni Mayor Garcia tungod kay wala kini sa iyang buhatan dihang gitawagan. (WC). (BANAT NEWS)