Kagawad nga miinterbiner ug milayog sa opisyal gidakop

CEBU, Philippines - Gidakop ug gipaslak sa karsel ang kagawad sa barangay nga gipasanginlang hubog nga miinterbiner sa operasyon sa kapolisan ug milayog usab sa hepe sa kapulisan sa lungsod sa Alcoy niadtong Biyernes sa hapon.

Ang giingong pag-interbiner diha mahitabo sa sulod sa police station diin gidala sa mga polis ang lima ka mga tawo nga nadakpang nagsugal sa sitio Alang-alang sa barangay Daanlungsod, lungsod sa Alcoy nianang adlawa.

Ang nagtingkagol og apil sa karsel mao ang kagawad nga si Bryan Romanos,34, taga sitio Datag sa barangay Daanlungsod.

Una niini gidakop sa mga polis sila si Samuel Sisiban, 54, Daphne Delosa Santos,19, Dorna Requiso, 27, Irene Pelage, 26, ug Pilar Jimenez,45, pulos nagpuyo sa maong lugar. Sila gidakop tungod kay nagduwa og bingo.

Matud ni PO2 Marvel Pardo sa Alcoy Police Station dihang nahinabi sa Banat News naatlan sa nagpatrolyang mga polis ang maong mga dinakpan nga nagduwa og bingo duol sa dalan maong ilaha kining gipangdakop.

Sumala pa nga pag-abot nila sa presinto miabot usab si Romanos nga gihulagway sa kapulisan nga nakainom ug nasuko nganong gidakop ang lima diin usa niini mao iyang iyaang si Jimenez.

Matud ni PO2 Pardo bisan og giunsa og pasabot sa ilang hepe nga si Police Insp. Arvi Arbuis si Romanos wala kini maminaw ug nakiglalis ug gilayog pa ang maong opisyal hinungdan nga ilang gidakop ug gibalhog og apil sa karsel.

Kasong drunkenness, direct assault ug obstruction of justice ang ipasaka nila batok kang Romanos karung adlawa.

Gisuwayan unta pagkuha ning tigbalita ang habig ni Romanos may labot ning alegasyon apan mibalibad si Pardo sa hangyo ning tigbalita nga mahinabi unta pinaagi sa telepono ang maong kagawad tungod kay layo ra ang karsel nga gikahimutangan niini. (Darrel A. Carumba/EIM) (BANAT NEWS)