Pildero sa tong-it miluba angol sa barkada

CEBU, Philippines - Angol  ang  usa  ka  menor de edad   human  kini dunggaba  sa  barkada  nga  menor  de edad  ra  usab kinsa  naglagot  kay  napildi  sa tong-it   didto sa sitio Pulang Bukid, barangay Alang-Alang, dakbayan sa Mandaue  sa  miaging  Huwebes  sa gabii, ang Adlaw sa mga  Santos.

Si PO2 Diana Magbanua sa Women’s Section sa  Presinto 1 sa barangay Centro sa maong dakbayan nga nahinabi sa Banat News miingon nga kauban  ra  sa usa  ka grupo  ang  biktima  ug  ang suspek kansang  mga  ngalan  gipugngan  sa Banat News, nga nagduwa  og  tong-it  sa maong  lugar. Matud pa ni PO2 Magbanua nga naglagot  ang  suspek  kay  ang  biktima  nga  iyang  gikaatbang sa  tong-it nagpunay  og kadaug  samtang  siya nagpunay  usab  og kapilde.

Gumikan  sa iyang  pagpunay  og bagulbol, nagkatinubagay  sila  ug  ang  biktima apan gumikan  kay  init  nang  daan  og  ulo, dali kaayong  nakalanit  sa iyang kutsilyo  ang  suspek   ug  sa way  pupanagana  gihansak kini  ngadto  sa      nagkalainlaing  bahin  sa lawas  sa biktima.

Gihatud  dayon  sa  mga  kauban  ang biktima  ngadto   sa Mandaue City Hospital samtang  ang  suspetsado   nga nasikop  sa mga  silingan  gitugyan  dayon  kini ngadto  sa buhatan sa kapolisan.

Hinuon matud  pa  ni   PO2 Magbanua nga ang mga ginikanan sa biktima ug suspetsado nga nag-atubang sa iyang buhatan     nagkasabot nga ang  ginikanan  sa suspek  maoy  moabaga  sa gasto  sa tambalanan  ug  wala  na  lang  silay  kihaay. (BANAT NEWS)