Polis nadugta sa lawak

CEBU, Philippines - Nadugta ug nanimaho na ang lawas patay sa usa ka kanhi sakop sa Philippine National Police nga napalgan sulod sa gipuy-an niini didto sa Muana Compound, sa sitio San Roque, barangay Mambaling dakbayan sa Sugbo kagahapon sa alas 7:00 pasado sa buntag.

Ang maong kanhi polis mao si Gaudencio Fernandez, 27, kanhi usa ka SPO2.

Sa pasiunang imbestigasyon sa kapolisan nasayran nga si Mona Lisa Mercader nga piyado sa balay diin mag-abang og lawak ang biktima maoy unang nakadiskobre sa lawas patay niini. Kini dihang napugos kini    sa pag-abli sa lawak sa biktima gumikan sa reklamo sa ilang mga silingan bahin sa kabaho sa ilang palibot nga gidudahan nilang gikan sa lawak sa nahisgutang polis.

Matud pa ni Mercader nga misamot usab ang ilang katahap dihang ang palibot sa lawak sa biktima, gawas nga baho gipistahan pa usab sa mga langaw.

Dihang naablihan na ni Mercader ang lawak sa biktima nakaingon siya nga wala gayud sila mosipyat sa ilang pagtuo kay didto nila masuta nga dugay na diay nga namatay ang biktima tungod kay nag-anam ka kadugta ang lawas niini, hinungdan sa hilabihang kabaho ug ang pagpista sa langaw sulod sa iyang lawak.

Si SPO1 Rey Cuyos sa Homicide Section mibutyag sa Banat News nga ila pang gipaabot ang resulta sa awtopsiya aron pagtino sa hinungdan sa kamatayon ni Fernandez.

Matud pa ni Cuyos nga sa pagkakaron lisud kaayong ma-estbalisar ang hinungdan sa kamatayon sa biktima kay lata ug dugta na ang lawas niini.

Daghan kaayo ang mahimong hinungdan sa kamatayon, may kamatayon gumikan sa sakit ilabi na sa alta presyon ug atake sa sakit sa kasing-kasing, paghikog, o  kaha gipatay og laing tawo ug mao kini ang gisuta sa kapolisan.

Gumikan kay nadugta na, dili kalikayan nga nag-agus na ang tubig sa lawas niini, sumala ni Cuyos.  (BANAT NEWS)