Master plan kontra baha gimando sa RDC-7

CEBU, Philippines - Matubag na unya ang problema sa mga paglunop sa baha panahon sa ting-ulan pinaagi sa katumanan sa Metro Cebu Drainage Master Plan human ang Regional Development Council-7 miduso sa ilang resolusyon nga nagmando sa Department of Public Works and Highways-7 paghimo niini.

Sumala pa sa gipadalang pamahayag sa Cebu City Public Information Office dinhi sa Banat News, gipagawas ang maong resolusyon atol sa ikatulong full council meeting sa mga sakop sa RDC-7 nga gipangulohan ni Cebu City Mayor Michael Rama didto sa Dumaguete niadtong Oktubre 10. Si Rama nagkanayon nga kinahanglang mapatuman dayon ang maong plano tungod sa kamahinungdanong gamit niini sa publiko. Ang Cebu City ug Mandaue City maoy sagad nga bahaon panahon sa ting-ulan.

Gibasol ang kagamay ug kakulang sa mga kanal nga kadagaydayan sa tubig baha, nakapasamot usab sa problema sa baha ang mga basurang gipataka og labay sa mga hugawang mga tawo nga mobara sa mga kanal ug kasapaan hinungdan sa paglapaw sa tubig.Pipila na gihimong solusyon sa nagkadaiyang lokalidad sa Metro Cebu mao ang pagpanglimpyo sa mga kanal, pagpaayo, pag-ilis og mas dagkong imburnal ug uban pa apan kini gihulagway lang nga pulos “band aid” solution tungod kay walay klarong plano kung asa padulong ang tubig sa mga kanal. Dugang gituki ug giaprobahan sa RDC-7 mao ang mga proyektong planong tukoron sa nagkadaiyang probinsya sa rehiyon. (BANAT NEWS)