CEDC nahimong IMS certified

CEBU, Philippines - Human sa duha ka tuig nga operasyon ug pagpaabot, ang Cebu Energy Development Corporation nga gipanag-iya ni George Ty ang nahatagan na sa tulo ka Integrated Management System (IMS) certificates may labot sa Quality Management, Environmental Management ug Occupational Health and Safety Management.

Ang CEDC usa sa mga planta sa kuryente nga nagsuplay sa Sugbo nga duha ka tuig nang nag-operate gikan sa siyudad sa Toledo ug ‘sister company’ sa Toledo Power ug pulos subsidiaries sa Global Business Power. Sa gipadalang pamahayag sa tigpamaba sa CEDC nga si Jonji Gonzales, ang Certification International Philippines, Inc. (CIP) mitunol sa CEDC og certification nga ISO 9001, ISO 14001 ug OHSAS 18001 niadtong buwan sa Hulyo ning tuiga.

 Ang mga nahisgutang sertipikasyon nagpasabot nga maayo ang pagdumala, operasyon ug kaakohan sa maong kompanya ngadto sa mga kawani niini, komunidad ug sa kalikopan.

Ang tag-iya sa CEDC nga si Dr. Ty uban sa iyang kabanay nga mibisita sa planta gitunolan sa mga kadagkuan sa CEDC ug Toledo Power sa nahisgutang sertipiko.

"This milestone is a testament of the company's continuous efforts in enhancing the standards of its power plant operations and the competitiveness of the company as a whole," tipik sa pamahayag sa presidente sa Global Business Power Corporation Arthur Aguilar.

Sa sayo pa, ang Toledo Power Company una nang nakaangkon og susamang ISO standards niadtong Disyembre 29, 2009. Ang Cebu Energy Development Corporation ang labing una ug nag-una nga commercial coal-fired power plant sa nasud nga migamit og clean coal technology nga adunay 246 megawatts capacity. (BANAT NEWS)