Nagkupot pa og kutsilyo

CEBU, Philippines - Patay’ng lawas sa naghubo nga usa ka lalaking naggunit pa og kutsilyo sa tuong kamot ug sakoban sa walang kamot ang napalgang naglutaw sa kadagatan sa barangay Buaya sa dakbayan sa Lapulapu alas-8 pasado ang takna sa buntag kagahapon.

Si PO1 Jomar Florentino sa Homicide Section nga nahinabi sa Banat News gibanabanang nagpanuigon og 40 ngadto sa 50-anyos ang lalaki.

Kini napalgan sa manag-amahang sila si Diosdado, 71, ug anak niining si Arbey Macapas,19.

 Nagkawaykaway

Sa laing bahin, usa ka patay’ng lawas sa usa ka babaye ang nakuha sa dagat sa   barangay Poblacion sa lungsod sa Carmen niadtong Biyernes sa alas 2:55 sa hapon.

Ang maong babaye nga lima ka tiil ang gitas-on ug morena ang pamanit, slim ang panglawas nagsul-ob og puti nga t-shirt nga may rebeteng green sa atubangan ug nagkarsones.

Matud ni SPO2 Danilo Laurente, desk officer sa Carmen Police dihang nahinabi sa Banat News nakit-an sa mga tawo ang maong babaye nga naglakaw daplin sa dagat ug nagpunay og yawyaw.

Sunod nalang nabantayan nga mihumod na kini sa taga liog nga bahin sa dagat ug nagkawaykaway. Ang mga tawo daling mipahibalo sa kapolisan apan mitidlom na kini ug dangtan 30-minutos nga pinangita nakit-an kini sa ilawom apan patay na. (Edwin Ian Melecio ug report nila ni Romeo Limpangog ug Darrel A. Carumba/EIM) (BANATNEWS)