One Cebu gipalig-on

CEBU, Philippines - Nalig-on pag-ayo karon ang One Cebu Party ilabi na sa segundo distrito nunot sa pormal nga pagpanumpa sa ubay-ubay nga mga mayor lakip sa ilang mga konsehal, mga barangay kapitan ug ingon sa mga barangay leader niini.

Ang labing ulahi nga nanumpa isip membro sa One Cebu Party mao ang mga opisyal sa lungsod sa Dalaguete ug sa lungsod sa Alcoy niadtong miaging Biyernes.

Unang nanumpa ngadto kang Governor Gwendolyn Garcia nga maoy pangulo sa One Cebu Party   didto s a Dalaguete Sports Complex mao ang mga opisyal sa lungsod sa Dalaguete nga gipangulohan ni Dalaguete Mayor Ronald Allan Cesante ug Vice Mayor Jeffrey Belciña lakip na ang 33 ka mga kapitan sa barangay sa maong lungsod ug 2 mil ka mga house leader; women’s group; mga chapter president sa senior citizen ug uban pang sector sa maong lungsod.

Si Mayor Cesante mahinangpon kaayo nga ang iyang mga kaubang mga opisyal sa iyang lungsod nakighiusa kaniya pagsuporta sa One Cebu Party.

Kini tungod sa dakong natabang sa kagamhanan sa lalawigan sa panginahanglan sa katawhan sa maong lungsod.

Gipaambit usab nila ni Cebu 3rd district Cong. Pablo John “PJ” Garcia ug sa iyang tandem pagka-bise gobernador nga si Boboy Durano ang ilang kalipay ug kahinangop nga sila nahiabot sa maong lungsod ug nasinati nila ang kainit sa katawhan nga midawat kanila ug labaw sa tanan sa tinguha nila nga magpasakop sa   One Cebu Party. Samtang si Cebu 2nd district Cong. Pablo “Pabling” Garcia mipadayag usab sa iyang kalipay ug kahinangop kalabot sa maong kaugmaran.

Sa lungsod sa Alcoy mao usab ang gibuhat sa gobernador nga pagsuta sa katawan sa maong lugar nga gipangunahan ni Mayor Nicomedes delos Santos nga mosuporta sa   One Cebu Party. (BANAT NEWS)