Publiko gihagit pagsumpo sa krimen
CEBU, Philippines - Gihagit sa mga opisyales sa Department of Interior and Local Government (DILG)7 , ug uban pang ahensya sa kagamhanan ang publiko sa pagtabang sa kampanya batok sa kriminalidad alang sa pagpatunhay sa kalinaw ug kahusay sa nasud ilabi na dinhi sa rehiyon 7.
Ang maong hagit gihimo ni Regional Director Ananias Villacorta sa DILG7 atol sa pagsaulog nila sa ika-18 nga National Crime Prevention (NCPW) nga gipahigayon matag unang semana sa Septiyembre.
Matud pa ni Villacorta nga ang matag usa adunay mahinungdanong papel sa pagtampo alang sa malinaw’ng palibot.
Kay matud pa niya ang pagsumpo sa krimen dili lamang bugtong responsibilidad sa Philippine National Police (PNP) ug Armed Forces of the Philippines (AFP) kundi usa kini ka buluhaton sa tanang nagpakabana nga molupyo.
Sumala pa ni Villacorta nga iyang gipadayag ang iyang pagkapositibo nga ang publiko adunay gahum sa pagsulbad sa krimen nga dili lamang magsalig sa awtoridad .
Kini pinaagi sa pagsumbong dayon ngadto sa mga tinugyanan sa balaod kutob sa mga panghitabo sa ilang palibot nga makaungkag sa kalinaw sa ilang lugar.
Gikutlo ni Villacorta ang panultihon ni anhing Secretary Jesse Robredo kinsa kanunay’ng moingon nga ang matag usa adunay tahas sa pagsumpo sa krimen kun sa ang matag usa maglikay sa pagbuhat og krimen.
Gibutyag usab ni Villacorta nga kinahanglang buhaton gayud sa tanan ang ilang parte tungod kay ang pagsumpo sa krimen patigayon kini sa tanan dili lamang alang sa ilang kaugalingon kundi alang usab sa mga kabataan sa umaabot nga henerasyon. (BANAT NEWS)
- Latest
- Trending