Nangawat og wielding cable priso

CEBU, Philippines – Gipriso ang usa ka kawani sa dakong kompaniya didto sa barangay Buanoy, lungsod sa Balamban human kini hisakpi nga nangawat og mga wielding cable sa iyang gitrabahoan kagahapon sa alas 4:22 sa kaadlawon.

Ang nadakpan mao si Victor Candole, 23, minyo, tool keeper sa Dumdum Marine Services, usa ka sub -contractor sa THI.

Si PO2 Godofredo Dumdum sa Balamban Police Station mibutyag nga ang suspek nasakpan sa paggawas niya sa gate gikan sa iyang duty nga nagdala og tulo ka kilong wielding cable   nga iya sa kompaniya.

Ang nakasakop kaniya mao ang security guard nga si Rodrigo Villar, 48, minyo nga konektado sa Cape Agency nga nagbase sa siyudad sa Talisay ug nagpuyo sa Sitio Looc, Buanoy.

Matud ni PO2 Dumdum nga dihang girikisa sa guwardiya ang suspetsado, nahinulan niini ang gibakus nga tulo ka kilong wielding cable sa hawakan niini.

Nasayran nga tag P380 matag kilo ang nahisgutang kable nga maoy nakapabalhug sa suspek sa prisohan samtang gihikay na ang kaso batok kaniya. (WC) BANAT NEWS