Manag-uyab nasikop sa buybust

CEBU, Philippines - Nasikop sa kapolisan ang manag-uyab kinsa pulos   suspetsadong drug pusher atol sa buy bust operation sa kapolisan didto sa dalan La Purisima sa barangay Guizo, dakbayan sa Mandaue sa miaging gabii.

Si SPO2 Danilo Barrita sa kapolisan sa Presinto 3 sa Mandaue City Police Office (MCPO) nga nagbase sa barangay Basak miila sa mga nadakpan nga mao sila si Marcelino Ouano, 33, ug kapuyo niini nga si Annalyn Mapait ,alyas Milay, 32, nga pulos nagpuyo sa maong dapit.

Matud pa ni SPO2 Barrita nga nasakmit sa kapolisan gikan sa duha ka dinakpan ang 13 ka pakete sa gituohang shabu.

Si SPO2 Barrita miingon nga ang ilang hepe sa Presinto 3 nga si Senior Inspector Wilson Abot maoy nangulo sa maong buy bust operation human sa pipila ka adlaw nila nga pagpaniid sa mga lihok sa mga suspetsado.

Dugang pa niya nga ang ilang usa sa mga kaubang polis maoy gihimong police decoy nga mipalit og shabu sa managhigugmaay.

Dihang gitunol sa police decoy ang minarkahang salapi nga P200 gidawat dayon kini sa mga suspetsado uban sa pagtunol usab niya sa usa ka paketeng shabu ngadto sa decoy.Unya dihadiha gidasmagan dayon sa kapolisan nga gipangulohan ni Sr. Insp. Abot dayong sikop niini.

Ang dugang 12 ka mga pakete ilang nakuha dihang girikisa nila ang kalawasan sa managhigugmaay nga maoy himoon nilang ebidensiya sa kaso nga ilang gipasaka sa mga suspetsado bahin paglapas niini sa Republic Act 9165 kon Comprehensive Dangerous Drug Act of 2001

Sa pagkakaron nagpahayahay na sa prisohan ang duha. ( /WC) - BANAT NEWS