Taga Bo. Luz nalipay nga wa demolisa

CEBU, Philippines -  Wala mahinayon ang gikatakdang demolisyon sa kabalayan sa tulo ka mga sitio sa Barrio Luz sa miaging semana ug gihatagan pa og igong panahon ang duha ka habig aron makapangandam sa gitakda nga hearing sa korte karong Agosto 9, 2012.

Matud pa ni Evangeline Abejo, pangulo sa Nasudnong Katawhang Kabos (Nakabos) nga gipaneguro gyud sa buhatan sa Division for the Welfare of the Urban Poor (DWUP) nga katabangan ang mga maapektohan sa demolisyon nga nanimuyo sa sitio Langka, sitio Mabuhay ug sitio Lubi.

Kahinumdoman nga mokabat sa 40 ka mga pamilya ang maapektohan kung nahinayon   pa ang maong demolisyon sa miaging semana, ug nahuwasan sa kabalaka ang tanan human nila masayri nga wala kini ikapatuman.

Mapasalamaton usab kaayo si Abejo sa DWUP tungod sa mga pamaagi nga gihimo niini aron nga katabangan ang mga pamilyang apektado. Sayo niini gipadayag ni Abejo nga usa sa nalantawan sa mga tawo nga solusyon sa maong   demolisyon mao ang ilang pagpalit   sa luna nga ilang gitarokan og balay.

Gipadayag hinuon niya nga ang maong mga luna gipanag-iya sa nasudnong kagamhanan ubos sa Community Mortgage Program apan nasuta nga daghan kanila ang nadelatar sa pagbayad nga maoy hinungdan sa paghingilin kanila. Giklaro ni Abejo nga subo kaayong palandungon nga sayon-sayonon lang sila sa pagpapahawa nga unta ang yuta iya man sa gobiyerno.

Kasagaran sa mga maapektohan sa demolisyon nagpuyo na sa maong dapit sukad pa niadtong 1958 busa sakit kaayo sa ilang buot nga pahawaon sila sa ilang pinuy-anan . (BANAT NEWS)