Mananagat naguroy sa pumpboat

CEBU, Philippines - Patay nang nakit-an ang usa ka mananagat nga naguyod sa iyang kaugalingong pumpboat diha sa Hilutongan Channel sa lungsod sa Cordova sa milabay’ng adlaw.

Ang biktima mao si Aljon Pugoy, 30, residente sa barangay Catarman sa lungsod sa Cordova kinsa panagat ang panginabuhian.

Sa imbestigasyon ni SPO1 Henry Amores, alas 7:15 sa milabay’ng buntag usa ka Teofilo Pacaldo nga usa gihapon ka mananagat ang nakakita sa usa ka pumpboat nga nagdagan apan walay sakay nga tawo.

Sa iyang panguryoso nabantayan niya nga dunay giguyod ang maong pumpboat tungod sa kanaas sa tubig sa dagat nga dili normal sa kanaas sa gikan sa nagtuyok nga propeller.

Tungod kay wala gyud siya makakita kang Pugoy sa pumpboat niini nga nagdagan gigukod kini ni Pacaldo ug dihang nakaduol na siya nakit-an niyang naguroy na diay sa maong pumpboat si Pugoy.

Nagduda si Pacaldo nga gituyo og hikot ni Pugoy ang iyang kaugalingon nga iya usab gigaid sa iyang pumpboat gumikan sa kakusog sa balod aron dili kini mahilayo sa iyang pumpboat kun mahitabo man nga siya matagak. Ang susamang pamaagi sagad buhaton sa mga mananagat kun mopalawod nga dagko ang balod.Gituohang nahagbong sa pumpboat si Pugoy tungod sa dagkong bawod samtang kini nagbarogbarog sa luwang.

Apan si Amores nagdudang sa pagkatagak ni Pugoy sa iyang pumpboat nasangit kini sa mga pasol tungod kay gikatahong dunay mga nakit-ang taga alang sa isda nga nalubong sa lawas ni Pacaldo dihang kini napalgan.

Hinuon walay foul play nga nakita si Amores sa kamatayon ni Pugoy ug gituohang disgrasya gyud ang nahitabo gumikan sa dautang panahon.

Mipahimangno si Amores sa mga gagmay’ng mananagat nga dili na lang gyud mopugos sa pagpanagat kung dunay kakulian sa kahimtang sa panahon aron malikay sa disgrasya. – (BANAT NEWS)