65 anyos ug laing duha nag-pot session sikop

CEBU, Philippines - Usa ka senior citizen ug duha ka kaubang nagsuyop og shabu nasikop sa kapolisan sa usa ka balay sa barangay Tal-ot, lungsod sa Barili sa miaging Domingo sa buntag.

Ang mga nadakpan mao sila si Jose Luis Subingsubing, 65, Rogelio Monterola,30, ulitawo, ug   Roy Ponseca, 29, minyo, nga pulos molupyo sa Tal-ot.

Samtang ang ika-upat nga suspek nga nakaeskapo mao si Vincent Empinado, hingkod, nga taga barangay Mantalongon.

Si PO3 Heinie Aspera sa Barili Police Station mibutyag sa Banat News nga ang mga tanod maoy nakadiskobre sa mga suspek nga nagpunay og hingos og shabu sulod sa balay nga walay tawo.

Ang mga tanod nangayo dayon og back-up sa kapolisan dayon ilang giukoy ang mga suspetsado hinungdan nga nasakpan gayud nila sa akto nga puwerting nakasuyop sa aso sa shabu.

Nakuha gikan sa mga suspek ang mga drug paraphernalia nga naglakip sa 12 ka aluminum foil dili linukot, lima ka linukot nga aluminum foil, unom ka disposable lighter, tulo ka posporo, mga linukot nga tissue ug uban pang gamitonon sa paghingos og shabu.

Wala hinuon makasakmit og shabu ang mga kapolisan nga mironda sa nahimutangan sa mga suspetsado kay gituohan nga nahurot na kini og gamit sa pag-abot sa kapolisan.

Ang mga dinakpan kasamtangang gibalhog    sa prisohan ug nagpaabot sa tukmang kiha nga ipasaka batok kanila. (BANAT NEWS)