Kapalaran sa Guadalupe mahibaw-an karon

CEBU, Philippines -  Gipahibalo sa Kapitan sa Guadalupe nga si Michael Gacasan ug kapolisan nga higpit nga seguridad ang gipatuman karong adlawa sa ilang barangay gumikan sa himuon nga plebisito sa planong pagbuak sa maong barangay.

Nasayran nga nakaalerto usab ang kinatibuk-ang kapolisan sa Siyudad sa Sugbo gumikan sa maong kalihukan ug gisugdan na ang liquor ban kaganihang alas-12 sa tungang gabii samtang ang gun ban motak-op pa karong Augusto 2.

Nagmalaumon si Gacasan nga wala’y mga kagubot karong adlawa sa Guadalupe Elementary School nga maoy nagsilbi nga voting center.

Kahinumduman nga dunay tensyon nga nahitabo sa miaging adlaw sa atubangang bahin sa panimalay ni kanhi Kongresista Antonio Cuenco kung diin nagkaabot ang duha ka kampo.

Samtang gipadayag ni Gacasan nga naa sa kamot sa katawhan ang mahimong resulta busa kinahanglan gyud nga mobotar sila karong adlawa aron mabati ang ilang mga sentimento kung supak ba sila nga buakon o dili ang Guadalupe o ilain ang Banawa-Ingles. Ang botasyon mobukas karong alas 7:00 sa buntag ug tapuson pagka alas 3:00 karong hapon.

Sa laing bahin, gikatakdang mopasaka og petisyon nga Writ of Quo Warranto si Cuenco batok kang Labangon Barangay Captain Victor Buendia tungod kay buot niyang mataktak kini sa pagkabarangay kapitan.

Matud pang Cuenco, si Buendia walay katungod nga mahimong kapitan sa Labangon tungod kay ang balay niini masakop man sa Guadalupe. Matud pang Cuenco ang Rosalina Village diin magpuyo si Buendia dili sakop sa Labangon maong dili kini mahimong mapiling barangay kapitan.

Si Cuenco wala mahimuot sa aktibong pangampanya ni Buendia batok sa pagbuak sa Guadalupe. Apan si Buendia miklarong ang iyang gihimo pagpanalipod lang sa ‘territorial jurisdiction’ sa Labangon tungod kay kung mahinayon nga mabuak ang Guadalupe, 13 ka sitio sa Labangon ang maapektuhan.

Gihulagway lang ni Buendia nga panglawgaw ang petisyon ni Cuenco. Ang maong petisyon kung dunggon sa korte momando kang Buendia pagpakita og mga dokumento ug pagmatuod nga angayan siya sa gihuptang posisyon.  (BANAT NEWS)