Babaye wa kabayad sa utang giluba angol

CEBU, Philippines - Nalandig sa tambalanan ang usa ka babaye kinsa gidunggab sa iyang silingan tungod sa iyang kapakyas pagbayad sa P1,000 niyang utang niini didto sa sitio City Central sa barangay Luz ning dakbayan sa Sugbo sa miaging hapon.

Ang biktima nailhan nga si Luwella Amahan Mendoza, 29, nagpuyo sa maong lugar samtang ang suspetsado nailhan usab nga sila si Juvelyn Invento, 42, ug ang kapuyo niini nga si Marlon Gelig, 38.

Sa inisyal nga imbestigasyon sa kapolisan nasayran nga ang biktima didto sa sulod sa ilang balay sa dihang nabati niya ang siyagit ni Invento sa gawas sa ilang balay.

Dihang gisusi sa biktima maoy misugat kaniya ang tulisok sa suspetsado kay naningil kaniya sa iyang P1,000 nga utang uban sa pag-ingon nga “baga ka og nawong” apan   misunod si Gelig ug gipapauli niini sa ilang balay si Invento.

Apan paglabay sa pipila ka gutlo mipatim-aw pag-usab ang mga suspetsado sa balay sa biktima ug nakita nga si Invento may dala nga kutsilyo ug gimandaran ni Gelig nga ipaluba ang biktima.

Dihang nasuta sa biktima nga lubaon siya niini mipunit siya og bato ug gilabay ngadto kang Invento.

Apan giingong gihilam-os lang ni Invento ang bato ug dihang nakasikit kini sa biktima gihandosan dayon sa iyang kutsilyo busa nasamad ang biktima sa walang kilid duol sa ilok.

Daling gihatud sa mga tagtungod ang  biktima ngadto sa Cebu City Medical Center samtang si Invento dali usab nga mitahan ngadto sa kapolisan.

Ang biktima mibutyag ngadto sa kapolisan nga aduna pa siya’y utang nga P1,000 sa suspetsado. Samtang gipangita pa sa kapolisan ang kapuyo    ni Invento kay misibat kini human sa hitabo. (/WC)(BANAT NEWS)