3 trabahante nalagpot sa eskplosyon sa gitrabahong barko 1 ang patay

CEBU, Philippines - Usa ka trabahante ang namatay samtang laing duha ang naangol sa kalit nga pag-ulbo nga nahitabo sulod sa Tsuneishi Heavy Industries sa barangay Buanoy sa lungsod sa Balamban niadtong Huwebes sa hapon.

Ang trabahante nga nakalas giila sa kapolisan nga mao si Randy Agsoy, 21, taga barangay Arpili sa maong lungsod sakop sa usa ka subcontractor sa Tsuneishi.

Samtang ang iyang duha ka mga kauban nga talandugon ang kahimtang mao sila si Rolly Narsico, 20, ug Kenneth Villarosa, 30.

Matud ni PO2 Godofredo Dumdum ang desk officer sa Balamban Police Station dihang nahinabi sa Banat News gitrabaho sa mga biktima ang usa ka manhole sa barko nga giayo dihang kalit lang mibuto ang electric blower niini.

Tungod sa kakusog sa pag-ulbo nalabay ang mga biktima paingon sa gawas ug didto na motugpa sa yuta ug giingong patay dihadiha si Agsoy tungod sa grabeng pagkasunog sa lawas niini samtang nangapaso usab ang duha ka kauban niini.

Ang duha gidala sa Balamban District Hospital apan girekomendar nga ibalhin og laing tambalanan sa dakbayan sa Sugbo.

Sa nahipos nga dugang impormasyon giingong nalabay ang mga biktima gibanabanang 80 ka tiil tungod sa kakusog sa pagbuto.

Ang kapulisan nakadawat na og pormal nga report sa maong panghitabo gikan sa chief security sa maong kompaniya ug gihimoan pa nila kini og dugang imbestigasyon tungod kay adunay nakalas ug naangol sa maong aksidente pagtino kung duna bay angayang manubag sa nahitabo.  (BANATNEWS)