Armas sa 4 polis negatibo
- Rey Pasaporte (The Philippine Star) - July 5, 2012 - 12:00am

CEBU, Philippines - Negatibo sa resulta sa ballistic examination sa PNP Crime Laboratory ang mga armas sa upat ka mga pulis sa Talamban Police Station nga mitahan sa ilang armas aron pagwagtang sa pagduda nga nakapabuto sila sa ilang armas niadtong Hunyo 21 diha sa sitio Tigbao sa barangay Talamban atol sa ginukdanay tali sa grupo ni Faustino Navarro Jr. kinsa napatay.

Sa nasayran si Chief Insp. Michael Angelo Beltran, hepe sa Talamban Police Station ug tulo ka mga sakop niini mitahan sa ilang armas ngadto sa Crime Laboratory aron ipailawom sa ballistic examination ang ilang armas.

Kini human sa pagduda nga napusilan patay si Navarro kinsa dunay samad sa iyang walang tampihak base sa resulta sa autopsy sa Medico-legal sa PNP Crime Laboratory.

Sa pasiunang imbestigasyon sa kapulisan gituohang naunay sa iyang gidala nga granada si Navarro hinungdan nga nabungkag ang iyang walang kamot ug nababha ang wala nga tuhod niini diha sa bakanteng luna dihang na-corner sa mga polis.

Apan nasuta nga dunay samad pinusilan si Navarro sa walang tampihak base sa resulta sa autopsy sa patay’ng lawas niini nga gihimo ni Dr. Nestor Sator sa PNP Crime Laboratory.

Si Chief Insp. Bonifacio Garciano, hepe sa Investigation and Detective Management Branch (IDMB) nagkanayon nga nagpasabot lang kini nga wala makapabuto sa ilang armas ang mga pulis sa Talamban nga migukod sa grupo ni Navarro.

Ang armas hinuon ni SPO1 Buboy Omaña sa Warrant Section sa Cebu City Police Office (CCPO) nga giingong gikawat sa miaging tuig sa ilang panimay ug nakit-an kilid sa patay’ng lawas ni Navarro maoy positibong nakapabuto niadtong higayona kini base sa findings usab sa Scene of the Crime Operatives (SOCO), matud pang Garciano.

“May posibilidad nga naghikog ‘to siya (Navarro) kay usa ka pulis sa Talamban nimando man nga surrender na lang, pero nagbitbit nang daan sa iyang armas unya dunay giibot mao ‘tong hand grenade,” asoy pang Garciano.

Gidugang niya nga base sa ilang imbestigasyon nasuta nga miyembro sa usa ka “Pulahan” si Navarro gumikan sa daghang habak ug mga ‘latin’ nga pangadye-on nga ilang nakuha sa patay’ng lawas niini.

Matud ni Garciano nga usa sa kauban ni Navarro nga pulahan nga nadakpan ug nabalhog didto sa Aloguinsan Police Station giingong naghikog sulod sa detention cell, apan wala siya makahatag og petsa kanus-a kini nahitabo.

Gidugang ni Garciano nga mohimo siya og resolusyon ug iyang tan-awon ang eksplinasyon ni Beltran ug ang report sa SOCO aron mawagtang na ang pagduda sa publiko. Ang kauban ni Navarro nadakpan samtang laing duha ang pabilin pang gipangita.

Ang ilang grupo gidudahan sa kapulisan nga manulis dinhi sa dakbayan sa Sugbu. - BANAT NEWS

ALOGUINSAN POLICE STATION ARMAS BONIFACIO GARCIANO CRIME LABORATORY GARCIANO ILANG NAVARRO TALAMBAN TALAMBAN POLICE STATION
  • Latest
  • Trending
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with