Kapolisan mag-rally karon

CEBU, Philippines - Ipahigayon karong hapon ang dakong rally sa kapolisan dinhi sa dakbayan sa Sugbo batok sa gidiling drugas nga salmotan sa nagkalain-laing sektor sa katilingban ug mga tinun-an gikan sa nagkalain-laing unibersidad.

Kini agi og kasaulogan sa Cebu City Police Office (CCPO) ang unang tuig nga anibersaryo sa Movement Against Drugs (MAD) nga gimugna sa miaging tuig ni Sr. Supt. Melvin Ramon Buenafe aron pakigbatokan ang ginadiling drugas.

Ang maong kalihokan agi usab og pagduyog sa kasaulogan sa miaging adlaw sa International Day Against Drug Abuse nga gisaulog sa kapolisan sa tibuok nasud.

Bahinon sa upat ka sector ang parade nga sugdan sa alas-2:00 karong hapon hangtud sa alas-4:00 sa hapon diin manukad ang sector one sa Mango Avenue, samtang ang sector 2 sa atubangan sa Capitol building, ang sector 3 manukad sa dalan V. Rama ug ang ikaupat , maggikan sa PRO-7 ug ang tanan mag-abot sa Fuente Osmeña oval.

Matud ni Buenafe nga sa alas 6:30 sa gabii ipahigayon ang rally nga tambongan sa nagkalain-laing sector sa katilingban, uban sa nagkalain-laing ahensya sa gobiyerno, mga tinun-an ug ingon man mosalmot usab ang ubang mga establisamento dinhi sa dakbayan sa Sugbo.

Gipaabot nga masinati ang kahuot sa dagan sa trapiko sa maong mga lugar sa tibuok hapon sanglit ang   mga mosalmot sa parade mogamit man sa usa ka lane sa karsada paingon sa Fuente Osmeña.

Matud ni Buenafe nga ipahigayon usab ang oath of commitment sa tanang motambong niini aron maghiusa sa pagpakigbatok sa kampanya sa kagamhanan batok sa gidiling drugas.

Adunay banda nga molingaw sa mga mosalmot samtang ipahigayon usab ang slogan making contest diin gidasig ni Buenafe ang mga motambong nga magdala og dili mominus napulo ka mga placard nga moapil sa maong contest nga kasuwatan   og mga mensahe.

Midugang si Buenafe nga sa katapusan sa maong kalihokan adunay effigy nga nagsimbolo sa tawo nga mabuang sa gidiling drugas nga gub-on pinaagi sa paggamit og bat.

 Sa miaging tuig mikabat og 22 mil ka tawo ang misalmot sa maong parade ug karon gipaabot nga mas modaghan pa ang mosalmot niini, sumala ni Buenafe.

(/WC)(BANAT NEWS)