Mikidnap sa bata nakuhaan og video footage

CEBU, Philippines - Gipagawas kagahapong adlawa sa Investigation and Detective Management Branch (IDMB) ang cartographic sketch sa duha ka mga hamtong nga babaye nga midagit sa usa ka batang nagpangidaron og kapin usa ka tuig niadtong Lunes sa sulod sa usa ka department store sa downtown area.

Ang deskripsyon sa usa gibanabang 40-anyos pataas, 5’2” ang height, chubby ang panglawas, taas ang buhok nga may bangs ug dunay ulat sa iyang liog; samtang ang ikaduha gibanabanang nagpangidaron og 30-anyos pataas, kasarangan ang gidak-on sa panglawas, taas ang kulongon nga buhok kutob sa abaga. Si Chief Insp. Bonifacio Garciano, hepe sa IDMB sa Cebu City Police Office (CCPO) nga nahinabi sa Banat News nagkanayon nga padayon pa nilang gisusi kun kidnapping o dili ang nahitabo sa batang si Jake Simbahon.

Matud ni Garciano walay CCTV camera sa 3rd floor diin nahitabo ang krimen dihang gikuha sa mga gikatahapan ang bata gikan ni Gina Pareja, 29, nga iyaan niini ug igsuon sa inahan sa bata nga si Diane Simbahon, 21.

Apan dunay CCTV camera diha sa escalator nga nakakuha og video footage sa usa ka babaye nga nagdala sa bata samtang ang kauban naglakaw lang sa hagdanan apan nagsenyasay ang duha sa ilang pagpanganaog.

Samtang sa laing kuha sa CCTV camera dunay lalaking kauban ang duha ka babaye diha sa gawas nga ilang gikaestorya ug nagdungan og lakaw padulong sa direksyon sa Cebu South Bus Terminal. (BANAT NEWS)