Estudyanteng nagsabak naghikog

CEBU, Philippines - Usa ka 14-anyos nga tinun-an kinsa naguol kay nagsabak og duha ka buwan naghikog pinaagi sa pagbitay og pisi sa balay sa iyang apohan didto sa barangay Basak, lungsod sa Compostela ug naugkat sa miaging Martes sa buntag. Ang mituyo sa pagpakamatay nga giila lang sa ngalang Nene, 14, ug nagtungha   sa high School giingong naaghat sa pagkutlo sa iyang kinabuhi human kuno sugoa sa uyab niini nga ipakuha ang iyang gisabak, sumala pa ni PO2 Arnie Goc-ong, ang imbistigador sa Compostela Police Station nga nahinabi sa Banat News.

Gumikan sa kahiubos ni Nene, milakaw kini niadtong Lunes   sa gabii nga wala mananghid sa iyang apohan ug nianang Martes sa alas 10:00 sa buntag nakit-an kini sa iyang iyaan nga si Riza Bitoon nga nagbitay na ug wala nay kinabuhi sulod sa balay sa iyang apohan nga wala nay tawo kansang liog gihiktan og pisi nga gigaid sa sagbayan ang pikas tumoy niini. (BANAT NEWS)