Tungod sa hubak pulso gilaslas

CEBU, Philippines - Usa ka ulitawo kinsa nag-antus sa sakit nga hubak milaslas sa iyang pulso sa pagtuo nga mao kini ang labing epektibong tambal sa iyang sakit didto sa barangay Tunga, lungsod sa Moalboal sa miaging Sabado sa gabii.

Si Lydio Nocos, 24, ulitawo, taga barangay Agbalanga sa maong lungsod nalandig sa Badian District Hospital human abisa ang iyang wala nga pulso pinaagi sa sanggot.

Si PO2 Steward Bayong sa Moalboal Police Station mibutyag sa Banat News nga si Nocos tulo ka tuig   nga nag-antus sa sakit nga hubak nga nagpuyo sa balay sa iyang ig-agaw nga si Josephine Abenido sa barangay Tunga.

Ang labing nakapaguol kang Nocos mao ang iyang sakit nga sa panahong moataki kini kaniya maglisud siya pagginhawa.

Gumikan kay hilomon walay laing kapahungawan sa iyang mga kaguol kundi mismo ang iya rang kaugalingon ilabi na dili usab kini hinuroy ug walay uyab ,sumala pa ni Abenido. Niadtong Sabado sa gabii milakaw si Nocos human mahuwasi gikan sa ataki sa hubak.  

Dihang gipangita kini ni Abenido    didto na kini sa gawas   sa ilang balay nga nagbuy-od sa yuta nga naglunang sa kaugalingong dugo gikan sa pulso nga gihiwa sa sanggot.

Gidala dayon nila ngadto sa tambalanan human masuta nga gihiwa niini ang iyang pulso sa tinguha nga magpakamatay, apan nasuwertihan kay malagmit gisakitan, hinungdan nga giundangan niini paggulgol ang iyang puslo. (/WC)  (BANAT NEWS)