Maayo mosayaw gipusil patay

CEBU, Philippines - Namatay dihadiha ang usa ka lalaki nga maayo

Ang biktima mao si Rodelo Santiago, 23, ulitawo nga usa ka construction worker nga nagpuyo sa maong dapit.

Si PO2 Luisito Ernie sa homicide section sa kapolisan sa maong dakbayan nga nahinabi sa Banat News miingon nga gikan pa nga misayaw ang biktima sa sulod sa diskohan   nga nakapahugyaw sa nanan-aw tungod sa kamaayo og abilidad ug kahanas niini sa   pagsayaw. Sumala ni PO2 Ernie nga sa wala pa pusila ang biktima, nagbalikbalik kini sa pagsayaw ug nagkalainlain ang babaye nga iyang gikapares nga nakalingaw kaayo sa mga tawo nga nagtan-aw.

Ang suliyaw sa mga pagdayeg sa katawhan maoy naghatag og dugang kaalegre sa maong disko tungod sa kahanite mosayaw sa biktima. 

Apan matud pa ni PO2 Ernie   nga dihang gibati og kaihion ang biktima miundang kini sa makadiyot og sayaw kay motuman sa sugo sa lawas dihang   kalit   kining gipusil sa wala hiilhing kriminal nga nag-atang kaniya didto sa ngitngit nga bahin gawas sa diskohan.

Ang lanog sa buto sa armas maoy nakapakurat sa katawhan ug labi silang gibati sa hilabihang kahadlok dihang nakita nila ang tawong gidayeg nila sa pagka-maayo mosayaw nahagba sa yuta nga naglunang sa kaugalingon niining dugo.

Dihang gisusi nila, nasabak sa ulo ang biktima nga maoy hinungdan sa hinanali niining kamatayon.

Dugang pa ni PO2 Ernie nga bisan wala na magginhawa ang biktima gidala lang gihapon kini ngadto sa Mactan Doctors Hospital sa barangay Basak sa maong dakbayan diin kini ideklarar sa mga doktor nga dead on arrival.

Si PO2 Ernie miingon nga sa imbestigayon nga ilang gihimo maoy ilang nasuta nga ang biktima adunay gikaaway nga mga batan-on usab sa maong dapit ug kini karon ang ilang gisubay sa pagsuta kun mao ba kini ang responsabli sa kamatayon sa biktima.

Ila usab nga sutaon kun wala ba kini kasuyai sa iyang kamaayo mosayaw. (BANAT NEWS)