Napikon sa komedya giluba angol

CEBU, Philippines - Kritikal ang kahimtang sa usa ka lalaki human unaya og dunggab sa iyang kainom kay napikon sa kinomedyahay nila didto sa Sitio Dakit, barangay Poblacion, lungsod sa Pinamungahan niadtong Huwebes sa alas 9:00 sa gabii.

Ang biktima mao si Joselito Layam, 48, minyo, ug nagpuyo sa maong lugar, samtang ang suspek mao ra usab ang iyang kauban nga si Charlie Puno, hingkod, nga silingan sa biktima. Si PO2 Alcris Labrador sa Pinamungajan Police Station mibutyag sa Banat News nga ang biktima ug ang suspek kauban sa ilang mga barkada    nagkasabot nga mag-inom og tuba.

Apan dihang nangahubog na mitumaw    ang ilang panaglalis kay wala kaagwanta sa kinomedyahay ang biktima hangtud nga nagkainitay ang lalis    ug nagkaaway sila.

Ang ilang mga barkada maoy miuwang ug mipakalma kanila ug gipapauli ang suspek aron paglikay sa dugang gubot.

Apan paglabay sa pipila ka gutlo nakahukom usab ang biktima nga mopauli sa ilang balay. Naglakaw kini nga nag-inusara apan sa pag-abot niya sa ngitngit nga bahin sa dalan kalit lang mitumaw ang suspek ug gihansakan ang iyang tiyan sa kutsilyo niini. Human mahagba sa yuta ang biktima dali kaayong nakabiya kaniya ang suspek ug maoy gipangita karon sa kapolisan.

Samtang ang biktima nga nadala sa Pinamungahan District Hospital gibalhin ngadto sa Vicente Sotto Memorial Medical Center sa dakbayan sa Sugbo gumikan sa katalandugon sa kahimtang niini. (/WC)    - BANAT NEWS