Paghiusa sa Cortes ug Ouano gipalig-on

CEBU, Philippines - Ang kalig-on karon sa panaghiusa sa mga pamilyang Cortes ug Ouano sa dakbayan sa Mandaue gituohan nga labing makapalipang sa ekonomiya sa maong dakbayan.

Nasud-ong kini sa mga tigpaniid niadtong miaging Lunes dihang si Mayor Jonas Cortes mismo ang mipalanog sa iyang awhag kalabot sa kamahinungdanon sa ilang panaghiusa.

Ang maong pamahayag gihimo ni Cortes samtang gipangunahan niya ang mga  opisyal sa kagamhanan sa dakbayan sa Mandaue sa pagtambong sa selebrasyon sa ika-42 nga kasumaran sa adlaw nga natawhan ni Konsehal Emmarie Lollipop Ouano Dizon didto sa balay niini.

Si Mayor Cortes ug Bise Mayor Glenn Bercede maoy nangulo sa mga sakop sa konseho sa pagtambong sa maong kalihokan uban usab sa ilang mga dumadapig ug mga lider niini.

Sa pamahayag ni Mayor Cortes iyang gipasabot ang panginahanglan sa kahiusahan sa mga dagkong lider sa dakbayan sanglit mao man kini ang paghingpit sa gitinguhang kalamboan sa Mandaue. Gitataw niya nga daan na nga nahimo sa ilang mga katigulangan ang paghiusa sa mga Mandauehanon sanglit dako kini og ikatabang sa katawhan nga ilang gialagaran.

Si kanhi mayor Alfredo “Pedong” Ouano miingon nga makaayo sa dakbayan ang pagtinabangay sa mga lider sa dakbayan nga maoy hinungdan nga gihimo niya ang tanan alang sa paghingpit sa iyang tinguha nga kahiusahan.

Matud pa ni kanhi mayor Pedong nga ang padayon nga pag-usbaw sa salapi nga nasulod sa panudlanan sa kagamhanan sa maong dakbayan maoy tataw kaayong timailhan nga nagkakusog ang pagsaka sa kinitaan sa dakbayan tungod sa kadaghang negosyante nga   mibubo sa ilang puhonan sa maong lugar.

Sa nasayran nga si Konsehal Ouano ug Konsehal Editha Cabahug nga kanhi gikan sa oposisyon hingpit na nga mitapon sa Liberal Party nga maoy partido ni Mayor Cortes.

Si Board Member Thadeo Ouano sa ikaunom nga distrito nagpabilin pa gihapon sa One Cebu ni Gobernador Gwendolyn Garcia hangtod niining panahona.

Gilauman nga mahimong walay kontra si Mayor Cortes sa ikatulong higayon sa iyang pagpasubli sa pagpapili sa maong katungdanan.

Samtang si Bise Mayor Glenn Bercede nga magpasubli usab sa pagpapili sa pagkabise-mayor gihapon may nagpanikad na nga moatbang kaniya.

Ang ikaatbang ni Bercede mao si kanhi konsehal Victor Biano nga nagtinguha nga mokandidato sa pagka-bise mayor sa umaabot nga election sa 2013 nga piniliay. (BANATNEWS)