Sisterhood sa Cebu ug Masbate pirmahan

CEBU, Philippines - Karong semanaha gitakda nga magpinirmahay og Sisterhood Agreement ang kagamhanan sa lalawigan sa Sugbo pinaagi ni Gobernador Gwendolyn Garcia ug Masbate Governor Rizalina Lanete.

Ang gobernador mobisita sa Masbate uban ang pipila ka mga mayor ug Board member sa lalawigan sa Sugbo.

Si Governor Gwen sa dihang nahinabi sa mga tigbalita miingon nga ang biyahe sa Roll On Roll Off kon RORO nga barko sa Cataingan Masbate ug dakbayan sa Bogo nagsilbi nga direct link sa probinsya sa Sugbo ug Masbate ug nagsilbi nga paagi aron mapalambo ang trade and commerce sa duha ka nahisgutan nga probinsiya.

Dugang pa ni Gobernador Garcia nga kauban usab sa Sugbo ang Masbate sa hugot nga kampanya batuk sa illegal fishing.

Gawas pa niini, misuporta usab ang Masbate sa horseshow and competition sa kagamhanan sa probinsiya sa Sugbo.

Gumikan sa maong kasabotan, daghan kaayong mapaabot nga mga dugang kaugmaran sa pagpalig-on sa maayong relasyon sa lalawigan sa Masbate ug Sugbo dili lamang sa natad sa turismo kundi bisan sa natad sa pamatigayon.

(BANATNEWS)