Grupo ni Cabando nia sa sugbo

CEBU, Philippines - Mabinantayon karon ang kapolisan human madawat ang intelligence report bahin sa giingong presensya sa grupo sa banggiitang mga tulisan nga gipangulohan ni Junjun Cabando dinhi sa Sugbo.

Kini maoy gibutyag ni Sr. Supt. Melvin Ramon Buenafe, hepe sa Cebu City Police Office (CCPO) sa press conference kagahapon sa hapon kinsa miingon nga ang Cabando Robbery Group gikan pa sa Ozamis City.

Sa miaging tuig, gitulis sa grupo ni Cabando ang usa ka empleyado sa bangko nga naghatud og kuwarta sa ilang kliyente sulod sa Robinsons Department Store sa uptown area ning dakbayan

Ilang gipusil ang teller sa bangko nga nagdala sa kuwarta ug ang duha ka guwardiya sa armored van gipusil usab sa iyang mga kauban sa gawas.

Apan naatol nga may mga polis nga nagsakay sa patrol car nga milabay sa maong lugar nga gisakyan ni SPO4 Alex Dacua sa Homicide Section kinsa maoy nakigpinusilay sa grupo ni Cabando nga miresulta sa kamatayon sa iyang tulo ka mga kauban, samtang namatay usab ang usa ka guwardya ug samaran ang laing duha ka polis nga sakop sa Mobile Patrol Group sa maong kombati.

Matud ni Buenafe nga iyang gialerto karon ang iyang tanang sakop aron masanta ang maong mga tulisan sa paghasol sa taga Sugbo.

Hinuon miingon si Buenafe nga wala pay klaro kun pila gyud ka tawo kining grupoha karon.

Iyang gipahimangnoan ang mga dagko ug gagmay’ng establisamento, sama sa bangko, pawnshop ug uban pa nga kinahanglan magbinantayon ning grupoha ug kutob sa ilang mamatikdan kalabot niini kinahanglang ila dayong itaho ngadto sa kapolisan.

Giangkon ni Buenafe nga ang dakbayan sa Sugbo sayon rang sudlon sa mga dautang elemento gikan sa laing lugar tungod sa daghang agianan nga puwede nilang malutsan hinungdan nga gipakusgan niya karon ang ilang foot patrol ug uban pang sistema sa pagbantay sa kasiguroan sa kalinaw ug kahusay dinhi sa dakbayan

Ang tanang puwersa gikan sa Special Weapons and Tactics (Swat) Team, ug Barangay Peacekeeping Action Team (BPAT) maoy ilang gipalihok pag-ayo karon sa pagpaniid sa grupo ni Cabando ug uban pang mga criminal element dinhi sa Sugbo.(/WC)(BANAT NEWS)