Gamay ra ang misalmot sa Earth Hour sa Cebu

CEBU, Philippines - Nagsugod kini sa Sydney, Australia niadtong 2007 nga ang tuyo mao nga makaginhawa og bisan usa ka oras sa tibuok tuig ang kalibutan gikan sa makadaot nga buga sa polusyon.

Niadtong Sabado, subling gilusad ang Earth Hour nga sumala pa sa mga organizers nagkaanam na og kadaghan ang partisipante nga gihulagway nilang maayong senyales nga naedukar na ang katawhan bahin sa global warming ug climate change.

Dinhi sa Cebu, diha gihimo ang seremonya sa ceremonial switch-off sa Cebu City Plaza Independencia ug sa Mindanao sa SM Davao, tungatunga sa daotang panahon.

Usa sa labing aktibong nagtamod sa Earth Hour ang Pilipinas ug maoy numero unong nasud nga may labing dako og nakonserbar nga enerhiya sulod sa tulo na ka tuig.

Ang Pilipinas karon maoy gibansagang 'Hero Country' kay kini maoy labing daghan og partisipante.

Niadtong 2009, gibanabanang 10 milyones ka Filipino ang miapil sa Earth Hour, ug naka-save og kapin 600 megawatt hours sa kuryente sulod sa 60-minutos nga wala magsuga. Niadtong 2011, 18 milyones ang miapil sumala pa sa report sa GMA News.tv. 

Naglaom ang Earth Hour Philippines nga karong tuiga magpabiling numero uno ang Pilipinas pinaagi sa kapin 1,500 ka mga lungsod ug siyudad nga miapil uban sa pipila ka mga kompanya, indibidwal ug uban pa nga kaugalingong kabubut-ong mipawong sa ilang suga sulod sa usa ka oras niadtong Sabado.

Diha sa Talisay, ang grupo sa kababayen-an, estudyante, kabatan-onan, mga opisyal sa dakbayan milusad sa Walk for Environment.

Ang simbahan nagpabagting sa kampana, nagpatingog usab sa ilang mga sirena ang kabomberohan ug kapolisan. Samtang ngit-ngit ang palibot ang Band Club & Dance Troupe sa Saint Scholasticas Academy nagpahigayon kini og interpretative song ug dance number ug duna pay nag-fire dance.

Si Ethel Natera ang tigpamaba sa Visayan Electric Company (VECO) sa pakighinabi niini sa Banat News nagkanayon mikabat sa 16 megawatts ang na-save nga kuryente atol sa Earth Hour niadtong Sabado sa gabii.

Apan gamay kini kumparar sa milabay’ng tuig nga 18 megawatts ang na-save nga kuryente.

Si Natera mibutyag nga karong summer 370 megawatts ang peak nga kinahanglon nilang supply sa kuryente alang sa ilang konsumidor tungod sa mas taas nga paggamit sa mga cooling appliances.

Si Natera nanawagan sa publiko nga aron makadaginot sa balayranan sa kuryente ang mga appliances nga wala gamita palungon kini ug ibton gikan sa plug.

Si Presidente Benigno Aquino III miingon nga bisan ang maayong maintenance sa mga sakyanan usa na ka paagi nga makatabang sa pag-save og enerhiya.

Sa Tagbilaran City, kapin sa 60 ka bikers ang miapil sa Earth Hour ug mipasalida og mga pamaagi sa pagmahal sa kalibutan. (BANAT NEWS)