12-anyos mikirig sa kuryente sa koral

CEBU, Philippines - Nagtinabangay sa imbestigasyon ang mga sakop sa Women and Children Desk Protection Section (WCDPS) ug ang Homicide Section sa kapolisan sa dakbayan sa Lapulapu kabahin sa kamatayon sa 12-anyos nga batang nakuryentihan sa koral palibot sa barracks sa usa ka contractor nga maoy nagtrabaho sa renovation sa usa ka dakong hotel resort sa barangay Punta Engaño sa maong dakbayan.

Si PO2 Winston Ybañez sa Homicide Section mitug-an sa Banat News nga ang 12-anyos kuyog sa laing tulo pa ka mga bata nga misuway unta pagsulod sa barracks nga gikural og laminated nga mga sako. Giingong unang nakasulod ang biktima apan nakurat nalang sila sa nabati nilang kalit nga pag-spark sa kuryente diha sa gisudlan sa biktima.

Dihang ilang gisusi ilang nakita nga mikirig na kini hinungdan nga nanagan sila ug nangayo og tabang sa mga tawo. Sumala pa ni Ybañez base sa ilang nakuhang impormasyon ang mga trabahante sa sulod sa barracks nga nakadungog sa singgit sa mga bata maoy giingong mipawong sa linya sa kuryente.

Ang mao usab nga mga trabahante maoy mitabang sa biktima pagdala sa Mactan Doctors Hospital apan gideklarar kini sa mga doktor nga dead on arrival.

Dugang pa ni Ybañez nga ilang gibalik kagahapon ang maong dapit alang sa pagkuha unta og dugang kasayuran sa hitabo apan walay nakig-atubang kanilang mga opisyales sa maong kompanya gawas lamang sa mga gwardiya nga nagbantay niini.

Wala hinuon maklaro kung gituyo pagbutang ang maong kuryente sa kural o linya ba kini sa suga ug kun duna bay gibutang nga pasidaan o warning ang maong kompanya palibot sa ilang kural nga nagpahibalo sa publiko kabahin sa livewire sa ilang perimeter fence isip pahimangno.

Matud pa ni Ybañez ilaha karong gisusi kung dunay tulubagon ang maong kompanya nga nakaingon sa kamatayon sa maong bata. (BANATNEWS)