Oaminal misaad tahas tumanon

CEBU, Philippines - Gipasalig ni kanhi Undersecretary Paul Clarence Oaminal sa Dangerous Drugs Board nga dili mapakyas ang paglaum sa mga Sugbuanon niining gitahas kaniya nga katungdanan isip chairman sa Anti-Vandalism Group (AVG) sa dakbayan sa Sugbo.

Ang maong pasalig gihimo kagahapon ni Oaminal human siya itudlo nga opisyal ni Mayor Michael Rama sa maong katungdanan niadtong Lunes.

Matud pa ni Oaminal nga andam siya nga makig-alayon sa tanang mga ahensya sa kagamhanan nga may labot sa pagpatunhay sa kalinaw ug sa kahinlo ning dakbayan.

Ang vandalismo usa sa dakong suliran sa kagamhanan ning dakbayan nga binuhatan sa mga grupo sa mga batan-on ug mga hamtong nga way laing gihuna-huna gawas sa paghugawhugaw sa mga bongbong , poste ug sa tanang lugar nga kasuwat-suwatan nila.

Matud pa ni Oaminal nga usa sa lig-on niyang katabang sa maong gimbuhaton mao ang mga opisyal sa barangay, kapolisan ug bisan ang kinabag-ang pundok sa mga ginikanan ug mga molupyo ning siyudad aron pagpakgang ning dautang buhat.

Sa pagtudlo ni Rama kang Oaminal sa bag-ong katungdanan, gilauman sa mayor nga mahimo nang epektibo ang kampanya batok sa vandalismo tungod kay may tawo na siyang gipiyalan nga manguna sa kampanya.

Gani ang kapolisan ug ang mga barangay tanod maoy nalantaw sa mayor nga lig-ong kaabag sa maong kampanya uban sa nagkalainlaing sektor sa katilingban.

Iyang giawhag ang mga opisyal sa kabarangayan sa dakbayan lakip na ang tanang station commander sa kapolisan nga mahimong kabahin sa AVG.

Samtang si Oaminal mitakda usab og tigom tali sa tanang mga lider sa mga sektor nga posibleng may labot sa iyang grupo una siya mosubo sa bag-o niyang tahas. (Sanden J. Anadia/WC) (BANAT)