Police asset gipatay

CEBU, Philippines - Patay ang usa ka 41-anyos nga sakop sa Carcar City Anti Crime Task Force ug usa ka babaye usab ang napagan dihang kalit gipusil samtang nagduwa og tong-its sa bilar sa haya sa patay nga iyang kaila sa sitio Upper Tawog, barangay Valladolid, siyudad sa Carcar kagahapon sa alas 3:00 sa kaadlawon.

Ang biktima nga patay nang nadangat sa tambalanan mao si Armand Alegarbe Lacoy, 41, nagpuyo sa sitio Tapon, barangay Poblacion sa dakbayan sa Carcar ug sakop sa Carcar City Anti Crime Task Force sa siyudad.

Padayon pa ang kapolisan sa pag-ila sa gikatahapan kinsa daling miikyas human sa hitabo.

Matud ni PO1 John Paul Melon sa Carcar City Police dihang nahinabi sa Banat News mibutyag base sa imbestigasyon, nagkalingaw og duwa og tong-its ang biktima nianang tungora dihang kalit giduol sa usa ka lalaki ug walay daghang estorya gipusil sa bukobuko ang biktima.

Tungod sa kalit nga pagkahagba sa biktima sa lamesang gisugalan ug nagkatibulaag ang mga tawo nga maoy gigamit nga higayon sa mamumuno sa pag-eskapo dungan sa pagpabuto sa iyang armas makadaghang higayon aron hadlukon pa ang mga tawo.

Ang biktima daling gitabang ug gihatud sa Carcar City District Hospital apan gideklarar kini sa mga doktor nga patay na.

Ang mga mirespondeng polis nakapunit og usa ka deformed slug sa kalibre .45 nga armas nga gituohang gikan sa armas sa gikatahapan.

Apan sa paghimo og pakisusi sa kapulisan nadiskubrehan nga duna pay laing napagan sa hitabo nga mao si Lorna Dentor, nagpuyo sa maong dapit nga usa sa mga namilar.

Si Dentor nakaangkon og samad pinusilan sa walang tiil ug daling gihatud sa Carcar City District Hospital. Ang kapulisan padayun pa sa ilang imbestigasyon sa maong hitabo ug gisubay na usab kung may kalambigitan ba sa trabaho niini isip anti-crime volunteer ang hitabu.(Uban sa report ni Lesley Caminade/EIM) (BANATNEWS)