Traffic enforcer gidasmagan

CEBU, Philippines -  Nag-atubang og tulo ka mga kaso ang usa ka drayber tungod sa pagkaangol sa traffic enforcer nga midakop kaniya dihang iyang nadasmagan ug naguyod sa gimaneho niining sakyanan.

Ang maong drayber nga gipasakaan og tulo ka mga kaso mao si Niel Segundino, 40, taga Aloguinsan ug temporaryong nagpuyo sa barangay Basak, dakbayan sa Mandaue ug drayber sa jeepney nga nagdala og plate number GWW 957 kinsa gipasakaan og kasong frustrated murder, driving without license ug uban pa.

Ang biktima nga nakabaton og grabeng pangos sa iyang kalawasan mao si Ringo Pinadora, traffic enforcer sa Traffic Enforcement Agency of Mandaue (TEAM) nga nadestino sa dalan A. del Rosario sa barangay Centro.

Si PO2 Jomar Ricaplaza sa traffic division sa Mandaue City Police Office (MCPO) nga nahinabi sa Banat News miingon nga gipahunong unta ni Pinadora si Segundino tungod kay mihunong kini sa no stopping area sa karaang merkado sa barangay Centro.

Giingong wala manumbaling si Segundino ug gipabulhot niini ang iyang jeepney paingon sa dalan Ouano Avenue sa reclamation area hinungdan nga gigukod kini ni Pinadora sa iyang motorsiklo.

Sa paglabay sa dalan Ouano Avenue sa reclamation area maoy nasugatan ang laing traffick enforcer ug dali kining nakapangayo og panabang sa paggukod sa suspek kinsa hingpit nga nadakpan dihang ilang gibabagan sa maong lugar.

Dihang giduol ni Pinadora ang jeepney ug gipangayo ang lisensiya ni Segundino kalit na niining gipabulhot ang sakyanan ug ning tungora naguyod si Pinadora ug nangapangos.

Ang mobile patrol sa kapolisan sa Mandaue City Police (MCPO) mao nay migukod sa suspek hangtud nga kini naabtan ug gibalhog sa bilanggoan. (BANATNEWS)