16-anyos gi-gang rape sa walo

CEBU, Philippines - Usa ka minor de edad ang midangop sa kapolisan human siya giingong gi-gang rape og walo ka lalaki lakip niini ang iyang hinigugma ug gibutangan pa gyud ang iyang kinatawo og sigarilyo niadtong Huwebes sa gabii pasado alas-11 sa usa ka barangay sa lungsod sa Poro.

Ang menor de edad nagpangidaron og 16-anyos miila sa tulo sa walo ka suspetsadong milugos kaniya apan tungod kay kaila ra kaayo kini sa biktima ug sa uyab niini nga usa usab sa mga suspek dili lang una sila panganlan sa Banat News aron matago ang pagkatawo sa biktima.

Sa pakighinabi sa Banat News sa hepe sa Poro Police Station nga si Insp. Bernabe Coyoca mibutyag nga gikuyogan sa uyoan ang biktima human sa pag-abuso.

Matud pa ni Coyoca nga base sa alegasyon sa biktima gidala kini sa hinigugma niini nga maglaag ngadto sa baybayon apan natingala nalang ang biktima nga gidala siya sa usa ka payag.

Didto sa payag matud niini gilugos siya sa uyab bisan paman sa iyang pagbabag ug pagkisikisi milampos kini.

Apan dakong kahibulong usab sa biktima nga human siya pahimusli sa uyab dunay laing mga lalaki ang nagbanos-banos pagpahimulos kaniya ug gilupig siya sa kusog sa mga lalaking nagtabang pag-abuso sa iyang lawas.

Dugang sumbong sa biktima nga gibutangan pa og nagsigang sigarilyo ang kinatawo sa biktima matud pang Coyoca.

Ang biktima gipahiling na sa mga doktor aron isuporta unya sa kasong ipasaka batok sa mga suspek nga naglakip sa wala pa manganling lima ka mga tawo gawas sa tulo nga nailhan sa biktima nga una na nilang nadakpan.

Gibana-bana nga 150 metros ang gilay-on sa payag ngadto sa mga panimalay hinungdan nga walay nakadungog sa siyagit sa biktima nga nangayo og tabang.

Nasayran usab nga nailo na ang biktima ug ang uyoan nalang niini ang nag-atiman kaniya.(Uban sa report ni Darrel Carumba/EIM)  (BANATNEWS)